పురావస్తు పరిశోధకులు ఈజిప్టులోని కైరో నగరానికి సమీపంలో ఉన్న పురాతన సమాధుల ప్రదేశం ‘సఖారా’ (Saqqara)లో ఒక సున్నపురాయి పెట్టెలో భద్రపరిచిన 4,300 ఏళ్ల నాటి మమ్మీని కనుగొన్నారు. ఈ మమ్మీ శరీరం పూర్తిగా బంగారు రేకులతో (Gold leaves) కప్పబడి ఉండటం విశేషం.
సొరంగ మార్గం: సుమారు 49 అడుగుల లోతైన నిలువు సొరంగం అడుగున, ఒక దీర్ఘచతురస్రాకార సున్నపురాయి శవపేటిక (Sarcophagus) కనుగొనబడింది. ఇది నాలుగు వేల ఏళ్లకు పైగా సున్నపు మిశ్రమంతో సీల్ చేయబడి, అప్పటి స్థితిలోనే ఉంది. ఆ పేటిక లోపల ‘హెకా-షెపెస్’ (Heka-shepes) అనే వ్యక్తి మమ్మీ బంగారు రేకులతో చుట్టబడి ఉంది. అక్కడ లభించిన శాసనాల ఆధారంగా ఈ సమాధి ఈజిప్టులోని 5వ మరియు 6వ రాజవంశాల కాలానికి చెందినదని పరిశోధకులు నిర్ధారించారు.
మరో సమాధి: మరోచోట 33 అడుగుల లోతైన సొరంగంలో ‘ఫెటెక్’ (Fetek) అనే వ్యక్తికి చెందిన మూడు రాతి విగ్రహాలు, చెక్క బొమ్మలు లభించాయి. వాటి పక్కనే ఒక బలిపీఠం మరియు శవపేటిక కూడా ఉన్నాయి. చనిపోయిన తర్వాత జీవితంలో (Afterlife) ఆ వ్యక్తికి సహాయం లభిస్తుందనే నమ్మకంతో ఈ విగ్రహాలను ఉంచినట్లు భావిస్తున్నారు.
చిన్న వస్తువులు.. పెద్ద సమాచారం: సమాధి పరిసరాల్లో లభించిన తాయెత్తులు, సౌందర్య సాధనాలు మరియు కుండలు అప్పటి జీవనశైలి గురించి కీలక సమాచారాన్ని అందిస్తున్నాయి. మమ్మీని తయారు చేసేటప్పుడు బ్యాక్టీరియా చేరకుండా, దుర్వాసన రాకుండా ఉపయోగించే నూనెలు, రెసిన్లను ఈ కుండల్లో భద్రపరిచినట్లు పరిశోధకులు గుర్తించారు.