ఉత్తరప్రదేశ్ రాష్ట్రం కాన్పూర్ నగరంలోని ఉర్సులా ఆసుపత్రిలో వైద్యులను విస్మయానికి గురిచేసిన ఒక విచిత్రమైన, అరుదైన శస్త్రచికిత్స విజయవంతంగా పూర్తయింది.
కాన్పూర్ సరసయ్యా ఘాట్ ప్రాంతానికి చెందిన 45 ఏళ్ల వ్యక్తి దీర్ఘకాలంగా పైల్స్ (మూలవ్యాధి) సమస్యతో బాధపడుతున్నాడు. దీనికి ఉపశమనం కోసం కొందరి సలహా మేరకు, వేడి నీటిలో వేడిచేసిన ఒక రాయిని తీసుకుని పైల్స్ ఉన్న చోట కాపడం పెట్టుకుంటూ వస్తున్నాడు.
ఈ క్రమంలో ఒకరోజు అజాగ్రత్త వల్ల సుమారు ఒకటిన్నర కిలోల బరువున్న ఆ వేడి రాయి ప్రమాదవశాత్తు అతని మలద్వారంలోకి జారి లోపలే ఇరుక్కుపోయింది. దీంతో విపరీతమైన బాధ మొదలైనప్పటికీ, బిడియం, సిగ్గు కారణంగా వెంటనే ఆసుపత్రికి వెళ్లకుండా దాదాపు 48 గంటల పాటు ఆ రాయితోనే ఇంట్లో తీవ్ర నరకయాతన అనుభవించాడు. సమయం గడుస్తున్న కొద్దీ నొప్పి భరించలేనంతగా పెరిగిపోవడంతో, గత్యంతరం లేక ఉర్సులా ఆసుపత్రికి వచ్చి డాక్టర్ ప్రశాంత్ మిశ్రా ఓపీడీ (OPD) విభాగంలో సంప్రదించాడు.
వైద్యులు అతనికి ఎక్స్-రే తదితర పరీక్షలు నిర్వహించిన తర్వాతే మలద్వారంలో భారీ రాయి ఇరుక్కున్న విషయాన్ని గుర్తించి నిశ్చేష్టులయ్యారు. ఆ రాయి పేగుల్లోకి మరింత లోపలికి వెళ్లిపోతే ప్రాణాలకే ముప్పు వాటిల్లుతుందని గ్రహించిన డాక్టర్ ప్రశాంత్ మిశ్రా నేతృత్వంలోని వైద్య బృందం వెంటనే రంగంలోకి దిగింది. అత్యంత జాగ్రత్తతో శస్త్రచికిత్స నిర్వహించి, ఆ ఒకటిన్నర కిలోల రాయిని విజయవంతంగా బయటకు తీశారు. ప్రస్తుతం ఆ వ్యక్తి ప్రాణాపాయం నుంచి పూర్తిగా కోలుకుని ఆరోగ్యంగా ఉన్నట్లు వైద్యులు తెలిపారు.