వాషింగ్టన్: హోర్ముజ్ జలసంధిని తిరిగి తెరవడానికి అమెరికా అధ్యక్షుడు డొనాల్డ్ ట్రంప్ ఇరాన్‌కు 48 గంటల గడువు విధించారు. ఒకవేళ ఇరాన్ ఈ గడువులోగా స్పందించకపోతే, ఆ దేశ ఇంధన వ్యవస్థను (Energy Infrastructure) పూర్తిగా తుడిచిపెట్టేస్తామని ఆయన హెచ్చరించారు. ఈ దాడులు ఇరాన్‌లోని అతిపెద్ద పవర్ ప్లాంట్ నుండే ప్రారంభమవుతాయని ట్రంప్ స్పష్టం చేశారు.
ట్రంప్ సోషల్ మీడియా పోస్ట్: తన ‘ట్రూత్ సోషల్’ ఖాతాలో ట్రంప్ ఇలా పేర్కొన్నారు: “ఇరాన్ ఇప్పటి నుండి సరిగ్గా 48 గంటల్లోగా ఎటువంటి బెదిరింపులు లేకుండా హోర్ముజ్ జలసంధిని పూర్తిగా తెరవాలి. లేనిపక్షంలో అమెరికా వారి వివిధ పవర్ ప్లాంట్లపై దాడులు చేసి వాటిని ధ్వంసం చేస్తుంది.”
నేపథ్యం: ఇజ్రాయెల్‌లోని డిమోనా మరియు అరాద్ నగరాలపై ఇరాన్ భారీ క్షిపణి దాడి చేసిన కొద్ది గంటలకే ట్రంప్ నుండి ఈ హెచ్చరిక వచ్చింది. డిమోనాలో ఇజ్రాయెల్ యొక్క ప్రధాన అణు కేంద్రం ఉంది. అంతకుముందు శనివారం ఇరాన్‌లోని ‘నతాంజ్’ అణు కేంద్రంపై జరిగిన దాడికి ప్రతికారంగానే తాము ఈ చర్య తీసుకున్నట్లు ఇరాన్ ప్రకటించింది. అయితే ఈ దాడితో తమకు సంబంధం లేదని ఇజ్రాయెల్ వాదిస్తోంది.
ప్రపంచ ఇంధన మార్కెట్‌లో అలజడి: హోర్ముజ్ జలసంధిని ఇరాన్ మూసివేయడం వల్ల ప్రపంచ ఇంధన మార్కెట్ అతలాకుతలమైంది. ప్రపంచ చమురు సరఫరాలో 20 శాతం ఈ మార్గం ద్వారానే జరుగుతుంది. ఇంధన ధరలు పెరగడం అమెరికాలో జరగబోయే మధ్యంతర ఎన్నికలపై ప్రభావం చూపుతుండటంతో ట్రంప్ ఈ కఠిన నిర్ణయం తీసుకున్నారు. భారత కాలమానం ప్రకారం మార్చి 22 ఉదయం 5:14 గంటలకు ట్రంప్ ఈ పోస్ట్ చేశారు. అంటే ఇరాన్‌కు మార్చి 24 ఉదయం 5:14 గంటల వరకు మాత్రమే సమయం ఉంది.