బీజింగ్: ఎలక్ట్రిక్ కారు కొనాలనుకునే ప్రతి ఒక్కరినీ వేధించే ఒకే ఒక్క ప్రశ్న.. “ఛార్జింగ్ కావడానికి ఎంత సమయం పడుతుంది?”. ఆ ఆందోళనకు చైనా దిగ్గజం బీవైడీ (BYD) తెరదించింది. ఊహకందని వేగంతో, కళ్లు మూసి తెరిచేలోపే మీ కారును సుదీర్ఘ ప్రయాణానికి సిద్ధం చేసే అద్భుతాన్ని ఆవిష్కరించింది.
ఒక్క ‘టీ’ తాగే లోపే.. 800 కిలోమీటర్ల ప్రయాణం!
వచ్చే నెలలో ఐరోపా మార్కెట్లోకి అడుగుపెట్టబోతున్న బీవైడీ ప్రీమియం మోడల్ ‘డెంజా జడ్9జీటీ’ (Denza Z9GT) ఇప్పుడు ఆటోమొబైల్ ప్రపంచంలో హాట్ టాపిక్. ఈ కారు ప్రత్యేకత వింటే ఆశ్చర్యపోవాల్సిందే. మనం ఒక కప్పు టీ తాగే లోపే, అంటే కేవలం 5 నిమిషాల్లోనే ఈ కారు బ్యాటరీ 10% నుండి 70% వరకు ఛార్జ్ అవుతుంది. ఒక్కసారి ఫుల్ ఛార్జ్ చేస్తే ఏకంగా 800 కిలోమీటర్ల దూరం నిరంతరాయంగా ప్రయాణించవచ్చు.
గడ్డకట్టే చలిలోనూ రికార్డు వేగం
సాధారణంగా అతి తక్కువ ఉష్ణోగ్రతల వద్ద బ్యాటరీ పనితీరు మందగిస్తుంది. కానీ, బీవైడీ తెచ్చిన సరికొత్త ‘ఫ్లాష్ ఛార్జింగ్’ సాంకేతికతతో -30 డిగ్రీల సెల్సియస్ చలిలో కూడా కేవలం 12 నిమిషాల్లోనే 20 నుండి 97 శాతం ఛార్జింగ్ పూర్తవుతుంది.
“రేపటి ప్రయాణం.. ఇక నిరీక్షణ లేని ప్రయాణం” అనే నినాదంతో ఈ కారు గ్లోబల్ మార్కెట్లోకి దూసుకురాబోతోంది. పెట్రోల్ కొట్టించినంత వేగంగా బ్యాటరీ నిండుతుంటే, ఇక లాంగ్ డ్రైవ్‌లకు ఎలక్ట్రిక్ కారే సరైన ఛాయిస్ అని నిరూపిస్తోంది.