బాలీవుడ్ సూపర్ స్టార్ సల్మాన్ ఖాన్ ఒక ఉత్పత్తిని ప్రమోట్ చేస్తే, సామాన్య ప్రజలు దానిని గుడ్డిగా నమ్ముతారు. కానీ ఆ నమ్మకం ఎంతవరకు నిజం? కోటాలోని కన్స్యూమర్ కోర్టు దీనిపై తీవ్రమైన ప్రశ్నలు లేవనెత్తింది. ఒక పాన్ మసాలా ప్రకటనకు సంబంధించి సల్మాన్ ఖాన్ స్వయంగా కోర్టుకు హాజరుకావాలని కోర్టు ఆదేశించింది.
రూ. 5 ప్యాకెట్‌లో రూ. 4 లక్షల కుంకుమపువ్వు ఎలా? కోటాకు చెందిన న్యాయవాది ఇంద్ర మోహన్ సింగ్ హనీ వినియోగదారుల కమిషన్‌లో ఫిర్యాదు చేశారు. ‘రాజశ్రీ పాన్ మసాలా’ ప్రకటనలో సల్మాన్ ఖాన్ ప్రజలను తప్పుదోవ పట్టిస్తున్నారని ఆయన ఆరోపించారు. ఆ పాన్ మసాలాలో “కుంకుమపువ్వు” (కేసరి) ఉందని ప్రకటనలో క్లెయిమ్ చేస్తారు. అయితే, ప్రస్తుతం మార్కెట్‌లో కిలో కుంకుమపువ్వు ధర సుమారు రూ. 4 లక్షలు ఉంది. మరి కేవలం 5 రూపాయల ప్యాకెట్‌లో అసలైన కుంకుమపువ్వును అందించడం ఎలా సాధ్యమని ఆయన ప్రశ్నించారు. ఇది కేవలం యువతను భ్రమలోకి నెట్టి, క్యాన్సర్ వంటి వ్యాధులకు కారణమయ్యే హానికరమైన అలవాట్లకు బానిసలను చేయడమేనని ఆరోపించారు.
సల్మాన్ సంతకంపై అనుమానం: కోర్టు విచారణ సమయంలో మరో షాకింగ్ విషయం వెలుగులోకి వచ్చింది. సల్మాన్ ఖాన్ తరపున కోర్టులో దాఖలు చేసిన ‘పవర్ ఆఫ్ అటార్నీ’ పత్రాలపై ఉన్న సంతకాలు ఆయన అసలు సంతకాలతో సరిపోలడం లేదని ఫిర్యాదుదారు కోర్టు దృష్టికి తీసుకెళ్లారు. గతంలో జోధ్‌పూర్ జైలులో మరియు కోర్టులో సల్మాన్ చేసిన సంతకాలకు, ఇప్పుడు సమర్పించిన పత్రాలలోని సంతకాలకు మధ్య చాలా తేడా ఉందని వాదించారు. ఇది కోర్టును తప్పుదోవ పట్టించేలా నకిలీ పత్రాలను సమర్పించినట్లు అవుతుందని పేర్కొన్నారు.
జనవరి 20న కోర్టు విచారణ: కోటా కన్స్యూమర్ కోర్టు ఈ వాదనలను సీరియస్‌గా తీసుకుంది. సల్మాన్ ఖాన్ సంతకాలను ఫొరెన్సిక్ తనిఖీకి (Forensic Investigation) పంపాలని ఆదేశించింది. అంతేకాకుండా, సల్మాన్ ఖాన్ స్వయంగా జనవరి 20న కోర్టుకు హాజరుకావాలని ఆదేశాలు జారీ చేసింది. ఆ పత్రాలను నోటరీ చేసిన లాయర్‌ను కూడా విచారణకు పిలిపించింది.