US Venezuela Oil India Deal: భారత్‌కు మళ్లీ వెనిజులా నుండి చవకైన ముడి చమురు లభిస్తుందా? వాషింగ్టన్ నియంత్రణలో ఉండే ఒక ప్రత్యేక వ్యవస్థ ద్వారా భారత్ చమురు కొనుగోలు చేయడానికి అమెరికా సానుకూల సంకేతాలిచ్చింది. అయితే, ఇది భారత్‌కు లభించే నిజమైన ఉపశమనమా లేక అమెరికా షరతులతో కూడిన కొత్త వ్యూహమా?
భారత్‌కు చమురు కొనుగోలుకు అనుమతి లభిస్తుందా?
ట్రంప్ ప్రభుత్వానికి చెందిన ఒక సీనియర్ అధికారి భారత్ వెనిజులా నుండి చమురు కొనుగోలు చేయడానికి అమెరికా సిద్ధంగా ఉందని స్పష్టం చేశారు. భారత్ పెరుగుతున్న ఇంధన అవసరాల దృష్ట్యా ఈ అనుమతి ఇస్తారా అని అడిగిన ప్రశ్నకు ఆయన కేవలం “అవును” అని సమాధానమిచ్చారు. అయితే, ఈ ఒప్పందానికి సంబంధించిన పూర్తి నిబంధనలపై ఇంకా కసరత్తు జరుగుతోందని ఆయన తెలిపారు.
అమెరికా ఈ డీల్‌ను ఎందుకు నియంత్రించాలనుకుంటోంది?
అమెరికా ఇంధన శాఖ కార్యదర్శి క్రిస్టోఫర్ రైట్ ప్రకారం.. వెనిజులా చమురు మళ్లీ అంతర్జాతీయ మార్కెట్లోకి వస్తుంది, కానీ అది పూర్తిగా అమెరికా పర్యవేక్షణలో ఉంటుంది.
- వాషింగ్టన్ నియంత్రణ: చమురు విక్రయం, చెల్లింపులు మరియు సరఫరా – అంతా అమెరికా నియంత్రణలోనే ఉంటాయి.
- నిధుల నిర్వహణ: చమురు అమ్మకం ద్వారా వచ్చే డబ్బు నేరుగా అమెరికా నియంత్రిత ఖాతాల్లోకి వెళ్తుంది. ఏ దేశం ఎంత చమురు కొనుగోలు చేయాలో కూడా వాషింగ్టన్ నిర్ణయిస్తుంది.
భారత్‌కు ఈ ఒప్పందం ఎంత కీలకం?
గతంలో ఆంక్షలు విధించకముందు వెనిజులాకు భారత్ అతిపెద్ద చమురు కస్టమర్.
- రిఫైనరీలకు సూట్ అవుతుంది: భారత్‌లోని రిఫైనరీలు వెనిజులా నుండి వచ్చే ‘హెవీ క్రూడ్’ (బరువైన ముడి చమురు) శుద్ధి చేయడానికి ఎంతో అనువైనవి.
- ప్రయోజనాలు: ఈ సరఫరా మళ్లీ మొదలైతే భారత్‌కు దిగుమతి ఖర్చులు తగ్గడంతో పాటు ఇంధన భద్రత లభిస్తుంది.
50 మిలియన్ బ్యారెళ్లు మరియు 100 బిలియన్ డాలర్ల వ్యూహం?
న్యూయార్క్‌లో జరిగిన ఇంధన సదస్సులో ఒక ఆసక్తికర విషయం వెలుగుచూసింది. అమెరికా తన నిల్వల్లో ఉన్న 30 నుండి 50 మిలియన్ బ్యారెళ్ల వెనిజులా చమురును విక్రయించాలని ప్లాన్ చేస్తోంది. వెనిజులాలో చమురు కంపెనీలు 100 బిలియన్ డాలర్ల వరకు పెట్టుబడి పెట్టవచ్చని స్వయంగా డొనాల్డ్ ట్రంప్ పేర్కొన్నారు. కానీ, ఇక్కడ ఒకే ఒక షరతు – ప్రతి నిర్ణయం అమెరికా మాత్రమే తీసుకుంటుంది.