డిజిటల్ ఇండియా, ఆన్లైన్ పేమెంట్స్ అని ఎంత వేగంగా దూసుకుపోతున్నా, చేతిలో కాగితపు నోట్లు పట్టుకోవడంలో ఉండే తృప్తే వేరు. 2016 నోట్ల రద్దు తర్వాత మనం రూ. 10 నుండి రూ. 500 వరకు రకరకాల నోట్లను చూశాం. అయితే, గత కొన్ని రోజులుగా సోషల్ మీడియాలో ఒక వార్త వైరల్ అవుతోంది. 500 రూపాయల నోటుకు బదులుగా త్వరలో రిజర్వ్ బ్యాంక్ ఆఫ్ ఇండియా (RBI) రూ. 700 నోట్లను విడుదల చేయబోతోందని ప్రచారం జరుగుతోంది.
సోషల్ మీడియాలో హల్చల్: ఎక్స్ (ట్విట్టర్) వేదికగా ఒకరు 700 రూపాయల నోటు ఫోటోను షేర్ చేశారు. ఆ నోటుపై మహాత్మా గాంధీ చిత్రం, అశోక చక్రం, భారత దేశపటం అచ్చు అచ్చుగా ఉన్నాయి. కానీ, దానిపై అమెరికాకు చెందిన నాసా (NASA) చిహ్నం ఉండటం గమనార్హం. మరొక ఫోటోలో మైసూర్ దగ్గరి వేణుగోపాల స్వామి ఆలయ చిత్రం కూడా ఉంది. ఇది చూసి నిజంగానే ఆర్బీఐ కొత్త నోట్లను తెస్తోందా అని ప్రజలు గందరగోళానికి గురయ్యారు.
నిజం ఏమిటి? ఈ 700 రూపాయల నోటు వార్త పూర్తిగా అబద్ధమని, ఇది కేవలం ఎవరో చేసిన ఎడిటింగ్ పని అని ఆర్థిక నిపుణులు మరియు నిజనిర్ధారణ సంస్థలు స్పష్టం చేశాయి. 700 రూపాయల నోటును ప్రవేశపెడితే చిల్లర సమస్యలు మరింత పెరుగుతాయని, అటువంటి ప్రణాళిక ఏదీ లేదని ఆర్బీఐ అధికారులు స్పష్టం చేశారు.
నిజమైన వార్త ఏంటంటే: ఈ వదంతుల వెనుక ఒక ఆసక్తికరమైన నిజం ఉంది. కరెన్సీ నోట్ల ఆయుష్షును పెంచడానికి, తయారీ ఖర్చును తగ్గించడానికి రిజర్వ్ బ్యాంక్ ‘ప్లాస్టిక్ కరెన్సీ’ (పాలిమర్ కరెన్సీ)ని ప్రవేశపెట్టే ఆలోచనలో ఉంది. 2012లో ఈ ప్రతిపాదనను ఆర్బీఐ మొదట పరిశీలించింది, ఇప్పుడు సుమారు 14 ఏళ్ల తర్వాత ఈ ప్లాస్టిక్ నోట్ల పథకం మళ్లీ ఊపందుకుంది. ఆస్ట్రేలియా, సింగపూర్, కెనడా వంటి దేశాల్లో ఇప్పటికే ఈ పాలిమర్ నోట్లు విజయవంతంగా అమల్లో ఉన్నాయి. భారతదేశంలో ఈ నోట్లు ఎప్పుడు విడుదలవుతాయనే దానిపై ఇంకా అధికారిక ప్రకటన రాలేదు.