ఇరాన్ గనుక అణ్వాయుధాన్ని తయారు చేయడంలో విజయం సాధిస్తే, పశ్చిమ ఆసియా ముఖచిత్రం పూర్తిగా మారిపోతుంది.
గత 16 రోజులుగా పశ్చిమ ఆసియాలో యుద్ధం కొనసాగుతోంది. క్షిపణులు, ఆత్మాహుతి డ్రోన్లతో ఆ ప్రాంతం దద్దరిల్లుతోంది. అయితే, ఈ శబ్దాల మధ్య అత్యంత నిశ్శబ్దంగా ఒక చోట ఇరాన్ తన అణ్వాయుధ తయారీని కొనసాగిస్తోందన్న వార్తలు వస్తున్నాయి. ఇరాన్ అణు శాస్త్రవేత్తలు 24 గంటలూ శ్రమిస్తున్న ఈ కేంద్రం ఒక రహస్య పర్వతం అడుగున ఉంది. ఈ వార్త అమెరికా రక్షణ ప్రధాన కార్యాలయం ‘పెంటగన్’లో భయాందోళనలు కలిగిస్తోంది.
పికాక్స్ పర్వతం: ఒక ప్రకృతి సిద్ధ కోట బయటకు చూడటానికి ఎడారిలా, సాధారణంగా కనిపించే ఈ పర్వతం లోపల అత్యంత ప్రమాదకరమైన అణు ప్రాజెక్ట్ నడుస్తోంది.
- లోతు: ఈ పర్వతం సుమారు 5,000 అడుగుల ఎత్తు కలిగి ఉంది. దీని అడుగున 329 అడుగుల లోతులో బంకర్లు నిర్మించారు.
- సురక్షితం: ఇంత లోతులో ఉన్న కేంద్రాలను ప్రపంచంలోని అత్యంత శక్తివంతమైన ‘బంకర్ బస్టర్’ బాంబులు కూడా ఏమీ చేయలేవు.
- కట్టుదిట్టమైన నిఘా: పర్వత ప్రాంతం కావడంతో డ్రోన్లు లేదా శాటిలైట్లు ఇక్కడ జరుగుతున్న పనులను స్పష్టంగా గుర్తించలేవు.
ముప్పు ఏమిటి? ఇరాన్ ఇప్పటికే తన వద్ద ఉన్న 400 కిలోగ్రాముల శుద్ధి చేసిన యురేనియంను ఈ రహస్య కేంద్రానికి తరలించినట్లు అమెరికా నిఘా సంస్థలు భావిస్తున్నాయి. అణ్వాయుధం తయారీకి యురేనియంను 90 శాతం వరకు శుద్ధి చేయాల్సి ఉండగా, ఇరాన్ ఇప్పటికే 60 శాతం లక్ష్యాన్ని చేరుకుంది. దీని అర్థం ఇరాన్ అణ్వాయుధానికి చాలా చేరువలో ఉంది.
అమెరికా ముందున్న సవాళ్లు: ఒకవేళ గగనతల దాడులు విఫలమైతే, అమెరికా తన ప్రత్యేక బలగాలను నేరుగా ఇరాన్ భూభాగంలోకి పంపి భూతల దాడి (Ground Operation) చేయాల్సి ఉంటుంది. కానీ పికాక్స్ పర్వతం చుట్టూ ఇరాన్ భారీగా సైన్యాన్ని మోహరించింది. అక్కడ చొరబడటం దాదాపు ఆత్మాహుతితో సమానమని నిపుణులు అంటున్నారు.