ఢిల్లీకి చెందిన హజ్రత్ అనే ఉబెర్ డ్రైవర్ ఇటీవల 50,000 ట్రిప్పులను విజయవంతంగా పూర్తి చేసి వార్తల్లో నిలిచారు. ‘డ్రైవింగ్ విత్ ఉబెర్ ఇండియా’ ఇన్‌స్టాగ్రామ్ పేజీలో పోస్ట్ చేసిన వీడియోలో ఆయన తన ప్రయాణాన్ని వివరించారు.
హజ్రత్ ప్రయాణం: ఉత్తరప్రదేశ్‌కు చెందిన హజ్రత్, తనకు చదువు రాదని, గతంలో మూడు సంవత్సరాల పాటు ఒక కుట్టు కంపెనీలో పనిచేశానని చెప్పారు. ఒక స్నేహితుడి సలహాతో ఉబెర్‌లో చేరినట్లు ఆయన తెలిపారు. “నాకు చదువు లేదు కదా, లొకేషన్లు ఎలా చూసుకోవాలో అని భయపడ్డాను. కానీ మెల్లగా పని చేస్తూ ఉంటే అనుభవంతో అన్నీ నేర్చుకోవచ్చని నా స్నేహితుడు ధైర్యం చెప్పాడు” అని ఆయన పేర్కొన్నారు.
సంపాదన వివరాలు: ఈ వీడియోలో హజ్రత్ మాట్లాడుతూ.. “నేను ఇప్పటివరకు 50,000 ట్రిప్పులు పూర్తి చేశాను. ఒక నెలలో నా అత్యధిక సంపాదన రూ. 1,20,000” అని వెల్లడించారు. ఉబెర్ లొకేషన్ సిస్టమ్ చాలా అద్భుతంగా పనిచేస్తుందని, తనకు నచ్చిన సమయంలో పని చేసుకునే వెసులుబాటు ఇక్కడ ఉందని ఆయన హర్షం వ్యక్తం చేశారు.