పంజాబ్కు చెందిన ప్రముఖ సోషల్ మీడియా ఇన్ఫ్లుయెన్సర్, 28 ఏళ్ల మంజీత్ కౌర్ను అత్యంత దారుణంగా సజీవ దహనం చేసిన ఘటన తీవ్ర కలకలం రేపింది.
చండీగఢ్లో గుర్తుతెలియని వ్యక్తుల చేతిలో కిడ్నాప్కు గురైన ఆమెను, మొరిండా సమీపంలో ఒక చెట్టుకు కట్టేసి నిప్పంటించినట్లు తెలుస్తోంది. తీవ్ర కాలిన గాయాలతో చండీగఢ్లోని పీజీఐఎంఈఆర్ (PGIMER) ఆసుపత్రిలో చేరిన మంజీత్ కౌర్, సుమారు 54 రోజుల పాటు మృత్యువుతో పోరాడి ఆగస్టు 26న చికిత్స పొందుతూ కన్నుమూసింది. ఆమె మృతితో ఈ దాడి కేసును పోలీసులు కిడ్నాప్, హత్య కేసుగా మార్చి ముమ్మర దర్యాప్తు ప్రారంభించారు.
ఈ ఘోర నేరంపై జరుగుతున్న విచారణలో, మంజీత్ కౌర్ పోస్ట్మార్టం నివేదిక మరొక విస్మయకర వాస్తవాన్ని వెలుగులోకి తెచ్చింది. ఆమె మరణించే సమయానికి దాదాపు ఏడు వారాల గర్భవతి అని వైద్య పరీక్షల్లో నిర్ధారణ అయ్యింది. ఈ విషయం తెలియడంతో హత్య వెనుక అసలు ఉద్దేశం ఏమై ఉంటుందనే కోణంలో దర్యాప్తు వేగం పుంజుకుంది. నిందితులకు ఆమె గర్భం దాల్చిన విషయం ముందే తెలుసా? ఇదే హత్యకు ప్రధాన కారణమా? అలాగే కుటుంబ సభ్యులు ఫిర్యాదులో పేర్కొన్న ఇద్దరు వ్యక్తుల నేపథ్యం ఏంటి? అనే అంశాలపై అధికారులు లోతుగా ఆరా తీస్తున్నారు.
కేసు తీవ్రత ఒకవైపు ఉండగా, పోలీసుల నిర్లక్ష్యంపై తీవ్ర విమర్శలు వ్యక్తమవుతున్నాయి. 54 రోజుల పాటు ఆసుపత్రిలో చికిత్స పొందుతున్న సమయంలో మంజీత్ కౌర్ పలుమార్లు స్పృహలోనే ఉన్నప్పటికీ, పోలీసులు ఆమె మరణ వాంగ్మూలాన్ని (Dying Declaration) ఎందుకు నమోదు చేయలేదని కుటుంబ సభ్యులు తీవ్రస్థాయిలో ప్రశ్నిస్తున్నారు. మహిళల రక్షణ, పోలీసు విచారణ పారదర్శకతపై ప్రశ్నలు లేవనెత్తుతున్న ఈ కేసులో.. సామాజిక మాధ్యమాల ప్రచారాలను పక్కనపెట్టి అధికారిక పూర్తి స్థాయి నివేదిక వెలువడితేనే అసలు నిజాలు బయటకు వస్తాయి.
Leave a Reply