ఇటలీ ప్రధాని జార్జియా మెలోనికి సంబంధించిన ఒక వీడియో ప్రస్తుతం సోషల్ మీడియాలో తెగ వైరల్ అవుతోంది. ఈ వీడియోలో ఆమె ముఖ కవళికలు నెటిజన్ల దృష్టిని ఆకర్షించడమే కాకుండా, పెద్ద ఎత్తున చర్చకు దారితీశాయి.
గత వారం రోమ్‌లో మొజాంబిక్ అధ్యక్షుడు డానియల్ చాపోతో మెలోని సమావేశమయ్యారు. ఈ భేటీ సందర్భంగా వారిద్దరి ఎత్తుల మధ్య ఉన్న భారీ వ్యత్యాసం అందరినీ ఆశ్చర్యపరిచింది. చాపోను చూసినప్పుడు మెలోని ఇచ్చిన సహజమైన రియాక్షన్ కెమెరాకు చిక్కింది.
మెలోని ఆశ్చర్యం
అధికారిక స్వాగతం పలికే క్రమంలో మెలోని, డానియల్ చాపో వైపు ముందుకు వెళ్లారు. ఆయన అసాధారణ ఎత్తును చూడగానే మెలోని కొన్ని క్షణాల పాటు షాక్‌కు గురైనట్లు వీడియోలో స్పష్టంగా కనిపిస్తుంది. ఆమె తల పైకెత్తి ఆయన ఎత్తును అంచనా వేయడానికి ప్రయత్నిస్తున్నట్లుగా చూశారు. ఆ తర్వాత ఆమె ముఖంలో చిన్న చిరునవ్వు కనిపించినప్పటికీ, ఆశ్చర్యం మాత్రం పూర్తిగా దాచుకోలేకపోయారు.
ఫోటోలకు ఫోజులిచ్చే సమయంలో కూడా మెలోని హావభావాలు నెటిజన్లను అలరించాయి. కెమెరా ముందు నిలబడినప్పుడు ఆమె అప్పుడప్పుడు పైకి చూడటం, తన ముఖ కవళికలను నియంత్రించుకోవడానికి ప్రయత్నించడం కనిపించింది. ఒక దశలో ఆమె మెల్లగా ఏదో గొణిగినట్లుగా కూడా అనిపించింది. దీనిపై సోషల్ మీడియాలో రకరకాల ఊహాగానాలు మొదలయ్యాయి.
అధ్యక్షుడు డానియల్ చాపో ఎత్తు ఎంత?
మొజాంబిక్ అధ్యక్షుడు డానియల్ చాపో తన ఎత్తు కారణంగా గతంలోనూ వార్తల్లో నిలిచారు. ఆయన సుమారు 6 అడుగుల 8 అంగుళాల పొడవు ఉంటారు. ఇది ఆయనను ప్రపంచంలోనే అత్యంత పొడవైన నాయకులలో ఒకరిగా నిలబెట్టింది. ఆయనకు బాస్కెట్‌బాల్ అంటే చాలా ఇష్టం.
మరోవైపు, జార్జియా మెలోని ఎత్తు సుమారు 5 అడుగుల 2 అంగుళాలు. అంటే వీరిద్దరి మధ్య దాదాపు ఒకటిన్నర అడుగు కంటే ఎక్కువ వ్యత్యాసం ఉంది. ఈ ఎత్తుల తేడా వల్ల ఫోటోగ్రాఫర్లు వారిద్దరినీ ఒకే ఫ్రేమ్‌లో బంధించడానికి చాలా కష్టపడాల్సి వచ్చింది. కొంతమంది ఫోటోగ్రాఫర్లు వంగి ఫోటోలు తీయగా, మరికొందరు నేలపై కూర్చుని లేదా పడుకుని విభిన్న యాంగిల్స్ నుండి ఫోటోలు తీశారు.