ఐపీఎల్ రికార్డ్స్: ఐపీఎల్ 2026 సీజన్లో అద్భుతమైన ఫామ్లో ఉన్న బ్యాటర్ల జాబితాలో శుభ్మన్ గిల్ అగ్రస్థానంలో నిలిచాడు. 19వ సీజన్లో 66వ మ్యాచ్లో 64 పరుగుల కీలక ఇన్నింగ్స్తో గిల్ రెండు అరుదైన రికార్డులను తన పేరిట లిఖించుకున్నాడు.
టీ20 ప్రపంచ కప్ 2026 జట్టులో చోటు దక్కించుకోలేక, తీవ్ర విమర్శలు ఎదుర్కొన్న గిల్, ఈ ఐపీఎల్ సీజన్లో పరుగుల వరద పారించి విమర్శకుల నోళ్లు మూయించాడు. అహ్మదాబాద్లోని నరేంద్ర మోదీ స్టేడియంలో చెన్నై సూపర్ కింగ్స్ (CSK)తో జరిగిన మ్యాచ్లో గిల్ మరోసారి తన కెప్టెన్సీ ఇన్నింగ్స్తో మెరిశాడు. కేవలం 37 బంతుల్లో 3 సిక్సర్లు, 7 ఫోర్లతో 64 పరుగులు చేసి జట్టు విజయంలో కీలక పాత్ర పోషించాడు. ఈ సీజన్లో ఇప్పటివరకు 13 మ్యాచ్లలో 47.38 సగటు, 161.68 స్ట్రైక్ రేట్తో మొత్తం 616 పరుగులు చేశాడు.
క్రిస్ గేల్ రికార్డును అందుకున్న గిల్: ఈ సీజన్లో 600 పరుగుల మార్కును దాటిన తొలి బ్యాటర్గా గిల్ నిలిచాడు. ఆ తర్వాత అతని జోడీ సాయి సుదర్శన్ కూడా ఈ ఘనతను అందుకున్నాడు. ఐపీఎల్ చరిత్రలో ఒకే సీజన్లో మూడుసార్లు 600కి పైగా పరుగులు చేసిన అరుదైన క్లబ్లో గిల్ చేరాడు. గతంలో 2023లో 890 పరుగులు, 2025లో 650 పరుగులు చేసిన గిల్, ఇప్పుడు 616 పరుగులతో డేవిడ్ వార్నర్, క్రిస్ గేల్ వంటి దిగ్గజాల సరసన నిలిచాడు. ఈ జాబితాలో విరాట్ కోహ్లీ 5 సార్లు ఆ ఘనత సాధించి అగ్రస్థానంలో ఉన్నాడు.
ఐపీఎల్ ఒక సీజన్లో అత్యధికసార్లు 600+ పరుగులు చేసిన బ్యాటర్లు:
- విరాట్ కోహ్లీ – 5 సార్లు
- కె.ఎల్. రాహుల్ – 4 సార్లు
- శుభ్మన్ గిల్ – 3 సార్లు
- డేవిడ్ వార్నర్ – 3 సార్లు
- క్రిస్ గేల్ – 3 సార్లు
టీ20 క్రికెట్లో 6,000 పరుగుల మైలురాయి: చెన్నైపై ఇన్నింగ్స్తో గిల్ తన కెరీర్లో మెన్స్ టీ20 క్రికెట్లో (దేశీయ, ఐపీఎల్ మరియు అంతర్జాతీయ కలుపుకొని) 6,000 పరుగులను పూర్తి చేసుకున్నాడు. దీని కోసం అతనికి 185 ఇన్నింగ్స్లు అవసరమయ్యాయి. ఈ క్రమంలో టీ20ల్లో వేగంగా 6,000 పరుగులు చేసిన ప్రపంచ స్థాయి ఆటగాళ్ల జాబితాలో గిల్ 7వ స్థానంలో నిలిచాడు.
టీ20ల్లో వేగంగా 6,000 పరుగులు చేసిన టాప్ బ్యాటర్లు:
- క్రిస్ గేల్ – 162 ఇన్నింగ్స్లు
- బాబర్ ఆజామ్ – 165 ఇన్నింగ్స్లు
- కె.ఎల్. రాహుల్ – 166 ఇన్నింగ్స్లు
- విరాట్ కోహ్లీ – 184 ఇన్నింగ్స్లు
- శుభ్మన్ గిల్ – 185 ఇన్నింగ్స్లు