అద్దె చెల్లింపు ఆలస్యమైందని ఫైన్ (జరిమానా) విధించిన ఇంటి యజమానికి.. ఇంట్లోని రిపేర్లు చేయాలని గత 63 రోజులుగా తాను పంపిన ఫిర్యాదులన్నింటినీ ఆధారాలతో సహా ఎక్సెల్ షీట్ (Excel sheet) రూపంలో పొందుపరిచి ఓ ‘జెన్-జీ’ (Gen Z) యువకుడు అదిరిపోయే కౌంటర్ ఇచ్చాడు. ఈ ఉదంతం ప్రస్తుతం సోషల్ మీడియాలో నవ్వులు పూయిస్తూనే, ఆసక్తికర చర్చకు దారితీసింది.
నేటి యువతరం తమకు ఎదురయ్యే చిక్కులను ఎంత చాకచక్యంగా, సాంకేతిక పరిజ్ఞానంతో ఎదుర్కొంటున్నారో చెప్పేందుకు ఈ ఘటనే చక్కని ఉదాహరణ. సాధారణంగా అద్దె చెల్లింపు కాస్త ఆలస్యమైతే యజమానులు ఫైన్లు విధించడం, దానికి అద్దెదారులు కిక్కురుమనకుండా సర్దుకుపోవడం చూస్తుంటాం.
కానీ, ఈ వ్యవహారంలో ఆ యువకుడు యజమాని జరిమానా డిమాండ్ చేయగానే మిన్నకుండిపోలేదు. గత రెండు నెలలకు పైగా ఇంట్లోని పగిలిన కిటికీలు, పాడైపోయిన పైపులు, వాటర్ లీకేజీలను బాగుచేయాలని తాను ఓనర్‌కు పంపిన వినతులు.. వాటిపై యజమాని ఎలాంటి చర్యా తీసుకోని వైనాన్ని తేదీల వారీగా ఆధారాలతో ఎక్సెల్ షీట్ డేటాగా ముందుంచాడు.
యజమాని అడిగిన అన్యాయమైన ఫైన్‌కు గణాంకాలతో కూడిన ఆధారాలతో ఆ టెక్కీ ఇచ్చిన ఈ దిమ్మతిరిగే సమాధానం నెటిజన్లను విపరీతంగా ఆకట్టుకుంది.
సోషల్ మీడియాలో తెగ చక్కర్లు కొడుతున్న ఈ ఉదంతం, ఇళ్ల యజమానులకు-అద్దెదారులకు మధ్య తరచూ తలెత్తే వివాదాలను సున్నితంగా ఎత్తిచూపడమే కాకుండా.. డిజిటల్ యుగంలో తమ హక్కులను నిరూపించుకోవడానికి ఎక్సెల్ షీట్ వంటి సాధనాలను ఎంత వినూత్నంగా వాడవచ్చో నిరూపించింది.
ఆ యువకుడి సమయస్ఫూర్తికి, తెలివితేటలకు నెటిజన్ల నుంచి ప్రశంసలు వెల్లువెత్తుతున్నాయి. అద్దె ఇళ్ల వ్యవహారాల్లో కేవలం అద్దెదారులు మాత్రమే కాకుండా యజమానులు కూడా తమ బాధ్యతలను సక్రమంగా నిర్వర్తించాలనే సందేశాన్ని ఈ ఘటన చాటిచెప్పింది.
Leave a Reply