చెన్నై: తమిళనాడు రాజకీయ రణం 2026 అసెంబ్లీ ఎన్నికల దిశగా శరవేగంగా కదులుతోంది. అధికార డీఎంకే కూటమికి ధీటైన ప్రత్యామ్నాయాన్ని నిర్మించాలని భావిస్తున్న తమిళ వెట్రి కళగం (TVK) అధ్యక్షుడు విజయ్, కాంగ్రెస్‌ను తనవైపు తిప్పుకోవడానికి భారీ ఆఫర్లను ప్రకటించినట్లు తెలుస్తోంది.
విజయ్ ఇచ్చిన ‘బంపర్ ఆఫర్లు’ ఇవే:
ప్రస్తుతం డీఎంకే కూటమిలో ఉన్న కాంగ్రెస్‌ను ఆకర్షించేందుకు విజయ్ పంపిన ప్రతిపాదనలు రాజకీయ వర్గాల్లో ప్రకంపనలు సృష్టిస్తున్నాయి:
- అసెంబ్లీ ఎన్నికలు: 70 అసెంబ్లీ స్థానాలు, అధికారంలోకి వస్తే 6 ముఖ్యమైన మంత్రి పదవులతో పాటు ఒక డిప్యూటీ సీఎం పదవి.
- స్థానిక సంస్థల ఎన్నికలు: 40 శాతం సీట్లు మరియు 8 మున్సిపల్ కార్పొరేషన్ల మేయర్ పదవులు.
- పార్లమెంట్ ఎన్నికలు (2029): ఏకంగా 28 ఎంపీ స్థానాల వరకు కేటాయింపు.
డీఎంకేలో కేవలం కొన్ని సీట్ల కోసం పోరాడుతున్న కాంగ్రెస్‌కు, ‘అధికారంలో భాగస్వామ్యం’ (Power Sharing) అనే ఆకర్షణీయమైన పాచికను విజయ్ విసిరారు.
విజయ్ పెట్టిన కఠినమైన షరతులు:
అయితే, ఈ చర్చలు రహస్యంగా సాగడంపై విజయ్ తీవ్ర అసంతృప్తితో ఉన్నారు. కాంగ్రెస్‌కు ఆయన కొన్ని కఠినమైన నిబంధనలు విధించినట్లు సమాచారం:
- రహస్య చర్చలు వద్దు: ఇకపై హోటళ్లలో రహస్య సమావేశాలు లేదా అర్ధరాత్రి ఫోన్ సంభాషణలు ఉండకూడదు.
- అధికారిక ప్రకటన: TVKతో కూటమిని బహిరంగంగా, అధికారికంగా ప్రకటించాలి.
- రాహుల్ గాంధీ భేటీ: కాంగ్రెస్ అగ్రనేత రాహుల్ గాంధీ స్వయంగా వచ్చి విజయ్‌ను కలవాలి.
కాంగ్రెస్‌కు ఇరకాటం.. ‘డబుల్ గేమ్’ అవుట్!
ఒకవైపు డీఎంకే కూటమిలో ఉంటూనే, మరోవైపు విజయ్‌తో చర్చలు జరుపుతున్న కాంగ్రెస్ నాయకుల వ్యూహాన్ని విజయ్ పసిగట్టారు. డీఎంకే దగ్గర ఎక్కువ సీట్లు రాబట్టడానికి తనను ఒక పావులా (బగడైక్కాయ్) వాడుకోవాలని చూస్తే కుదరదని ఆయన స్పష్టం చేశారు. దీంతో అటు డీఎంకేను వదలలేక, ఇటు విజయ్ ఇచ్చిన భారీ ఆఫర్‌ను వదులుకోలేక కాంగ్రెస్ నేతలు సందిగ్ధంలో పడ్డారు. ప్రస్తుతం వీరంతా ఢిల్లీ అధిష్ఠానం నిర్ణయం కోసం వేచి చూస్తున్నారు.