చెన్నై: రజనీకాంత్, కమల్ హాసన్, విజయ్, అజిత్ వంటి అగ్ర నటులతో కలిసి నటించి, ఆ తర్వాత హీరోగా తనకంటూ ఒక ముద్ర వేసుకున్న నటుడు కరణ్. గత పదేళ్లుగా ఆయన వెండితెరకు పూర్తిగా దూరమయ్యారు. ఆయన ఎందుకు సినిమాలకు దూరమయ్యారు, ప్రస్తుతం ఎక్కడున్నారు అనే విషయాలపై ఆస్కార్ మూవీస్ నిర్మాత బాలాజీ ప్రభు ఒక ఇంటర్వ్యూలో ఆసక్తికరమైన విషయాలను వెల్లడించారు.
బాల నటుడిగా ప్రస్థానం ‘మీడియా సర్కిల్’ అనే యూట్యూబ్ ఛానెల్తో మాట్లాడిన నిర్మాత బాలాజీ ప్రభు, కరణ్ చిన్నతనంలోనే ఎంతో చురుకైన నటుడని గుర్తుచేసుకున్నారు. ‘మాస్టర్ రఘు’ అనే పేరుతో మలయాళ చిత్ర పరిశ్రమలో బాలనటుడిగా అరంగేట్రం చేసి, 50కి పైగా సినిమాల్లో నటించి మంచి గుర్తింపు పొందారు.
తర్వాత కమల్ హాసన్ నటించిన ‘నమ్మవర్’ (మనవాడు) సినిమాతో కరణ్కు గొప్ప అవకాశం దక్కింది. ఆ సినిమాలో నెగటివ్ షేడ్స్ ఉన్న కాలేజీ స్టూడెంట్ పాత్రకు కరణ్ పక్కాగా సరిపోతారని కమల్ భావించారు. ఆ అంచనా నిజమై, కరణ్ వరుస అవకాశాలతో బిజీ అయ్యారు. కొన్నిసార్లు ఆయన నటన “ఓవర్ యాక్టింగ్” అని విమర్శలు వచ్చినా, ఆ స్టైల్ సామాన్య ప్రేక్షకులకు బాగా దగ్గరైంది.
హీరోగా సక్సెస్ విలన్గా, క్యారెక్టర్ ఆర్టిస్టుగా పేరు తెచ్చుకున్న కరణ్, తర్వాత హీరోగా ప్రయత్నించి ‘కొక్కి’, ‘తమ్మి వెట్టోత్తి సుందరం’, ‘కందా’, ‘కాత్తవరాయన్’, ‘కరుప్పుసామి కుత్తకారర్’ వంటి దాదాపు 20 నుండి 25 సినిమాల్లో హీరోగా నటించారు. అయితే, 2016లో వచ్చిన ‘ఉచ్చత్తుల శివ’ తర్వాత ఆయన మరే చిత్రంలోనూ కనిపించలేదు.
75 చెక్కులు బౌన్స్ కరన్ సినిమాలకు దూరమవ్వడానికి చిత్ర పరిశ్రమలో ఎదురైన మోసాలు కూడా ఒక కారణమని తెలుస్తోంది. ఆయన నటించిన సినిమాలకు సంబంధించి నిర్మాతలిచ్చిన సుమారు 75 చెక్కులు బ్యాంకులో బౌన్స్ అయ్యాయని, ఆ మొత్తం లక్షల్లో ఉంటుందని సమాచారం. కొంతమంది నిర్మాతలు నష్టాల వల్ల డబ్బు ఇవ్వలేకపోతే, మరికొంతమంది ఉద్దేశపూర్వకంగానే మోసం చేశారని నిర్మాత పేర్కొన్నారు.
అభిమానులే ఆస్తి డబ్బు కంటే అభిమానులనే ఎక్కువగా సంపాదించుకున్న నటుడు కరణ్. ఒకసారి ఇంటర్వ్యూలో “ఎంత సంపాదించారు?” అని అడిగితే, “నేను డబ్బు సంపాదించలేదు, అభిమానులను సంపాదించాను. డబ్బు ఖర్చైపోతుంది, కానీ అభిమానులు ఎప్పుడూ అలానే ఉంటారు” అని చెప్పేవారు. తన ఆఫీసులో అభిమానుల కోసం ప్రత్యేక గదిని కేటాయించి, పేద అభిమానుల పిల్లల చదువులకు సహాయం చేసేవారట.
ఆ మహిళ ఎవరు? సోషల్ మీడియాలో “ఒక మహిళ వల్ల కరణ్ కెరీర్ నాశనమైంది” అని వచ్చే వార్తలు పూర్తిగా అవాస్తవం. కరణ్ కెరీర్ పీక్ స్టేజ్లో ఉన్నప్పుడు, ఒక మహిళ ఆయనకు మేనేజర్గా ఉండేవారు. ఆమె కేవలం ఆయన కాల్షీట్స్, కథలు, రెమ్యునరేషన్ వంటి విషయాలను మాత్రమే చూసుకునేవారు. దీనిని వక్రీకరించి సోషల్ మీడియాలో అసత్య ప్రచారాలు చేయడం సరికాదని బాలాజీ ప్రభు ఖండించారు.
ప్రస్తుతం ఎక్కడున్నారు? కరణ్ అమెరికాలో సెటిల్ అయ్యారని ప్రచారం జరుగుతున్నప్పటికీ, ఆయన తిరుత్తణిలోని తన తోటలో ప్రశాంతమైన జీవితాన్ని గడుపుతున్నారని సమాచారం. అరవింద్ స్వామిలాగే కరణ్ కూడా మళ్ళీ ఒక మంచి కమ్ బ్యాక్ ఇచ్చే అవకాశం ఉందని ఆయన అభిప్రాయపడ్డారు.