విమానంలో ప్రయాణిస్తున్న 77 ఏళ్ల వృద్ధుడు ఒకరు చాట్‌జీపీటీ (ChatGPT) సహాయంతో కొత్త వ్యాపారం ప్రారంభించడానికి బిజినెస్ ప్లాన్ తయారు చేసిన ఘటన ప్రస్తుతం సోషల్ మీడియాలో అందరి దృష్టిని ఆకర్షిస్తోంది.
ఆయనతో పాటు విమానంలో ప్రయాణిస్తున్న టెక్నాలజీ రంగానికి చెందిన ఓ వ్యక్తి, ఈ పెద్దాయన తన మొబైల్ ఫోన్‌లో తీవ్రంగా ఏదో పని చేస్తుండటాన్ని గమనించాడు. మొదట సాధారణంగా ఏదో పని చేసుకుంటున్నారని అనుకున్నప్పటికీ, ఆ తర్వాత ఆయన వర్టికల్ ఫార్మింగ్ (Vertical Farming) కు సంబంధించిన బిజినెస్ ప్లాన్‌ను రూపొందిస్తున్నారని తెలిసింది.
తక్కువ స్థలంలో ఎక్కువ పంటలు పండించే వర్టికల్ ఫార్మింగ్ పద్ధతిని ఆధారంగా చేసుకుని, తన వ్యాపార ఆలోచనను మరింత మెరుగుపరచుకోవడానికి ఆ వృద్ధుడు చాట్‌జీపీటీ సలహాలు అడిగాడని సమాచారం. విమానం టేకాఫ్ అవ్వడానికి ముందు కూడా ఆయన తన ఫోన్‌లో చాట్‌జీపీటీతో చాట్ చేస్తూ, బిజినెస్ ప్లాన్‌లో అవసరమైన మార్పులు చేస్తుండటం విశేషం. ఆయన పట్టుదల పక్కనే కూర్చున్న ఆ టెక్ వ్యక్తిని ఎంతగానో ఆకట్టుకుంది.
ఇందులో మరింత ఆసక్తికరమైన విషయం ఏమిటంటే, ఆ 77 ఏళ్ల ప్రయాణికుడు చాట్‌జీపీటీతో మాట్లాడిన విధానం. ఏఐని కేవలం ఒక సాంకేతిక సాధనంగా మాత్రమే చూడకుండా, తనతో మాట్లాడుతున్న ఒక మనిషిలా భావించి ఎంతో మర్యాదగా సంభాషించాడు. చాట్‌లో పదేపదే “సార్” అని సంబోధిస్తూ కృతజ్ఞతలు చెప్పాడని, “మళ్లీ మీ వద్దకు వస్తాను అయ్యా” అని టైప్ చేశాడని సోషల్ మీడియాలో షేర్ చేసిన స్క్రీన్‌షాట్‌‌ల ద్వారా తెలుస్తోంది.
ఈ ఆసక్తికరమైన అనుభవాన్ని ‘Teknosaur’ అనే ఎక్స్ (X) యూజర్ తన సోషల్ మీడియా ఖాతాలో ఫోటోలతో సహా పంచుకున్నాడు. 77 ఏళ్ల వయసులో కూడా కొత్త వ్యాపారం ప్రారంభించడానికి ఆ వృద్ధుడు చేస్తున్న ప్రయత్నాన్ని చూసి తాను ఆశ్చర్యపోయానని, విమాన ప్రయాణంలో వారిద్దరి మధ్య మంచి స్నేహం ఏర్పడిందని అతను తెలిపాడు. చాట్‌జీపీటీ సహాయంతో బిజినెస్ ప్లాన్ తయారు చేయడం, ఏఐ పట్ల ఆయన చూపిన మర్యాదపూర్వక వైఖరి ప్రస్తుతం నెట్టింట నెటిజన్లను విశేషంగా ఆకట్టుకుంటోంది.