చెన్నై: నేడు (మే 4, 2026) వెలువడిన తమిళనాడు అసెంబ్లీ ఎన్నికల ఫలితాల్లో అధికార పార్టీ DMK తన కుర్చీని కాపాడుకోవడంలో విఫలమైంది. నటుడు విజయ్ నేతృత్వంలోని నూతన పార్టీ TVK (తమిళగ వెట్రి కళగం) 106 స్థానాల్లో ముందంజలో ఉండి, అతిపెద్ద పార్టీగా అవతరించింది.
ప్రభుత్వాన్ని ఏర్పాటు చేయడానికి అవసరమైన 118 స్థానాలు సొంతంగా లేనప్పటికీ, ఇతర పార్టీల మద్దతుతో విజయ్ అధికార పీఠాన్ని అధిరోహించడం దాదాపు ఖాయమైంది. TVK ఈ స్థాయి విజయం సాధించడానికి విజయ్ స్టార్డమ్ ఎంత కారణమో, ఆ పార్టీ తన మేనిఫెస్టోలో ప్రకటించిన హామీలు కూడా అంతే కారణమని విశ్లేషకులు భావిస్తున్నారు. మహిళలు, విద్యార్థులు, రైతులు మరియు ఆరోగ్య రంగానికి సంబంధించి విజయ్ ప్రకటించిన అద్భుతమైన ఉచిత పథకాలు ఓటర్లను ఆకర్షించాయి. అయితే, ఎన్నికల తర్వాత ఈ భారీ హామీలను విజయ్ నిజంగా నెరవేర్చగలరా? అన్న ప్రశ్న ఇప్పుడు అందరిలోనూ తలెత్తుతోంది.
మహిళలకు వరాల జల్లు:
- 60 ఏళ్లలోపు ఉన్న ప్రతి కుటుంబ యజమానిరాలికి నెలకు ₹2500 నగదు.
- అన్ని ప్రభుత్వ బస్సుల్లో మహిళలకు ఉచిత ప్రయాణం.
- ప్రతి కుటుంబానికి ఏడాదికి 6 ఎల్పీజీ గ్యాస్ సిలిండర్లు ఉచితం.
- వివాహం చేసుకోబోయే యువతులకు 8 గ్రాముల బంగారం మరియు పట్టుచీర ఉచితం.
- నవజాత ఆడ శిశువులకు బంగారు ఉంగరం మరియు వెల్కమ్ కిట్.
ఆరోగ్య రంగం:
- ప్రతి కుటుంబానికి ₹25 లక్షల ఉచిత ఆరోగ్య బీమా.
- ప్రపంచ స్థాయి వైద్య చికిత్సలు.
- ప్రభుత్వ పథకాలను ఎటువంటి లంచం లేకుండా పొందేందుకు ‘సిటిజన్ ప్రివిలేజ్ కార్డ్’.
విద్య:
- చిన్నకారు రైతుల పిల్లలకు ఉచిత ఉన్నత విద్య.
- 12వ తరగతి నుండి పీహెచ్డీ వరకు వడ్డీ లేని మరియు షూరిటీ లేని విద్యా రుణాలు (₹20 లక్షల వరకు).
- 500 అత్యున్నత నాణ్యత కలిగిన వసతి పాఠశాలలు.
నిరుద్యోగులకు:
- 29 ఏళ్లు దాటిన పట్టభద్ర నిరుద్యోగులకు నెలకు ₹4000.
- డిప్లొమా పూర్తి చేసిన నిరుద్యోగులకు నెలకు ₹2000 – ₹2500.
- ప్రతి ఏటా 5 లక్షల ఇంటర్న్షిప్లు; డిగ్రీ విద్యార్థులకు ₹10 వేలు, ఐటీ విద్యార్థులకు ₹8 వేల స్టైఫండ్.
- ప్రైవేట్ మరియు ప్రభుత్వ రంగాల్లో 75% ఉద్యోగాలు స్థానికులకే.
రైతులకు:
- 5 ఎకరాల కంటే తక్కువ భూమి ఉన్న రైతుల సంపూర్ణ రుణమాఫీ.
- 5 ఎకరాల కంటే ఎక్కువ భూమి ఉన్న రైతులకు 50% రుణమాఫీ.
- రైతులందరికీ 100% పంట బీమా.
- ఒక టన్ను చెరకుకు కనీసం ₹4500 మద్దతు ధర.
- మత్స్యకారులందరికీ గృహ నిర్మాణం.