అట్లాంటా: ఫిఫా (FIFA) ప్రపంచకప్ ఫుట్బాల్ టోర్నీలో అర్జెంటీనా జట్టు దిగ్గజ ఆటగాడు లియోనెల్ మెస్సీ ప్రతి మ్యాచ్లోనూ కేవలం 8.2 కిలోమీటర్లు మాత్రమే పరిగెత్తడం అభిమానుల్లో ఆశ్చర్యానికి గురిచేస్తోంది.
ఈ ప్రపంచకప్ టోర్నమెంట్లో 90 నిమిషాల పాటు పూర్తిగా ఆడిన ఆటగాళ్లలో అందరికంటే తక్కువ దూరం పరిగెత్తింది మెస్సీనే కావడం గమనార్హం.
ఫిఫా ప్రపంచకప్ ఫుట్బాల్ టోర్నీ ఫైనల్ మ్యాచ్లో స్పెయిన్ జట్టుతో అర్జెంటీనా తలపడనుంది. ఈ మ్యాచ్ కోసం ప్రపంచమంతా ఆసక్తిగా ఎదురుచూస్తోందని చెప్పవచ్చు. ఇటువంటి తరుణంలో మెస్సీ ఆటతీరుపై అంచనాలు భారీగా పెరిగాయి. ఎందుకంటే ఈ ప్రపంచకప్ టోర్నీలో మెస్సీ ఒక్కడే 8 గోల్స్ చేయడంతో పాటు, 4 అసిస్ట్లు (గోల్ చేయడానికి సహకరించడం) అందించాడు.
39 ఏళ్ల మెస్సీ ఇప్పటికీ అర్జెంటీనా జట్టులో అత్యంత కీలక ఆటగాడిగా కొనసాగుతున్నాడు. అలాగే, వయసుకు తగ్గట్టుగా వేగం తగ్గడంతో మెస్సీ తన ఆటతీరును కూడా మార్చుకున్నాడు. ఆ మార్పు వల్ల వచ్చిన ఫలితాలు అర్జెంటీనా జట్టుకు ఎంతో లాభాన్ని చేకూర్చాయి. అంటే, టోర్నీలో అతను మొత్తం 33 సార్లు గోల్స్ చేయడానికి ప్రయత్నించడంతో పాటు, 21 సార్లు గోల్స్ చేసే అవకాశాలను సృష్టించాడు.
1986 ప్రపంచకప్ టోర్నీలో అర్జెంటీనా తరపున ఆడిన మరడోనా తర్వాత ఈ స్థాయిలో రాణించడం ఇదే అత్యధికం. ఇది మాత్రమే కాకుండా, మెస్సీ మైదానంలో కవర్ చేసిన మొత్తం దూరంలో 47 శాతం దూరాన్ని కేవలం నడుస్తూనే పూర్తి చేయడం ఆశ్చర్యం కలిగిస్తోంది. ఫిఫా ప్రపంచకప్ టోర్నీలో ఒక మ్యాచ్ పూర్తిగా ఆడే ఆటగాళ్లు సగటున 12 కిలోమీటర్ల దూరం వరకు పరిగెత్తుతారు.
కానీ మెస్సీ మాత్రం కేవలం 8.2 కిలోమీటర్లు మాత్రమే పరిగెడుతున్నాడు. మిగిలిన సమయంలో మైదానంలో నడుస్తూనే ఆయా స్థానాలకు చేరుకుంటున్నాడు. వయస్సు పైబడటం వల్లే మెస్సీ ఇటువంటి శైలికి మారినట్లు విశ్లేషకులు భావిస్తున్నారు. అలా నడుస్తున్న సమయంలోనే ప్రత్యర్థి జట్టు వ్యూహాలను, వారి బలహీనతలను మెస్సీ సులభంగా గుర్తిస్తున్నాడు.
దానికి అనుగుణంగా మెస్సీ మైదానంలో ఎప్పటికప్పుడు ప్రత్యామ్నాయ వ్యూహాలను రచిస్తున్నాడు. అర్జెంటీనా జట్టు మెస్సీ కంటిసైగతో ఆడుతుండటానికి అసలు కారణం ఇదే. ఇప్పటికీ మెస్సీని కేంద్రంగా చేసుకునే అర్జెంటీనా జట్టు అటాకింగ్ (దాడి) వ్యూహాలు ఉంటాయనడానికి ఇదే నిదర్శనం. దీంతో, మెస్సీ ఈ ప్రపంచకప్ను గెలిచి సరికొత్త చరిత్ర సృష్టించాలని అభిమానులు ఆకాంక్షిస్తున్నారు.