పాశ్చాత్య దేశాల్లో 80 ఏళ్ల వృద్ధులు ఇప్పటికీ చురుగ్గా పుష్-అప్స్ వంటి కఠినమైన వ్యాయామాలు చేస్తుంటే, అదే వయసున్న మెజారిటీ భారతీయ పురుషులు పెద్ద బొజ్జతో, ఎటువంటి వ్యాయామం లేకుండా కనిపిస్తున్నారంటూ ప్రముఖ ఫిట్‌నెస్ ట్రైనర్ ఒకరు వ్యక్తం చేసిన అభిప్రాయం నెట్టింట తీవ్ర చర్చకు దారితీసింది.
విదేశీ వృద్ధుల ఆరోగ్యకరమైన జీవనశైలిని, వ్యాయామాలకు దూరంగా ఉండే భారతీయ వృద్ధుల జీవన విధానంతో పోలుస్తూ ఆయన మాట్లాడిన వీడియో సోషల్ మీడియాలో వైరల్‌గా మారి ఫిట్‌నెస్ ప్రేమికుల్లో సరికొత్త ఆలోచనలను రేకెత్తించింది.
పాశ్చాత్య దేశాల్లోని వృద్ధులు తమ వృద్ధాప్యంలో కూడా ఎంతో ఉత్సాహంగా ఉంటూ ప్రతిరోజూ వాకింగ్, జిమ్ కసరత్తులు, పుష్-అప్స్ వంటివి చేస్తూ శారీరక దృఢత్వాన్ని కాపాడుకుంటున్నారని సదరు ట్రైనర్ గుర్తుచేశారు.
అయితే భారత్‌లో మాత్రం 50 నుంచి 60 ఏళ్లు దాటగానే చాలామంది వ్యాయామాన్ని పూర్తిగా పక్కన పెట్టేస్తున్నారని ఆయన ఆవేదన వ్యక్తం చేశారు. సరికాని ఆహారపు అలవాట్లు, అస్తవ్యస్తమైన జీవనశైలి కారణంగా భారీ పొట్టతో పాటు మధుమేహం, రక్తపోటు వంటి దీర్ఘకాలిక సమస్యల బారినపడి ఇళ్లకే పరిమితమవుతున్నారని పేర్కొన్నారు.
వృద్ధాప్యం అనేది కేవలం విశ్రాంతి తీసుకోవడానికి మాత్రమే పరిమితం కాదని, శరీరాన్ని మరింత ఆరోగ్యంగా చూసుకోవాల్సిన సమయం కూడా అని ఆయన స్పష్టం చేశారు. ఈ వీడియో ఆన్‌లైన్‌లో విస్తృతంగా ప్రచారమవడంతో దీనికి అనుకూలంగా, ప్రతికూలంగా పెద్దఎత్తున స్పందనలు వెల్లువెత్తుతున్నాయి.
భారతీయులు తీసుకునే అధిక కార్బోహైడ్రేట్ల ఆహారం, విశ్రాంతి లేని కష్టపడే స్వభావమే ఇందుకు ప్రధాన కారణమని కొందరు వాదిస్తున్నప్పటికీ.. పాశ్చాత్యుల తరహాలోనే భారతీయ పురుషులు కూడా వయసు పైబడిన తర్వాత ఫిట్‌నెస్, ఆరోగ్యానికి ప్రాధాన్యత ఇవ్వాలనే విషయంలో ఎలాంటి సందేహం లేదు.