మహారాష్ట్ర రాష్ట్రం ముంబైలోని గోరేగావ్ ప్రాంతంలో పనిచేస్తున్న ఒక సంస్థలో 29 ఏళ్ల పురుష ఉద్యోగి ఒకరు, తన మహిళా పై అధికారి నిరంతరం లైంగికంగా వేధిస్తున్నారని పేర్కొంటూ సోషల్ మీడియా ప్లాట్‌ఫారమ్ రెడిట్‌లో పెట్టిన పోస్ట్ ప్రస్తుతం వైరల్ అవుతూ చర్చనీయాంశంగా మారింది.
ఆ ఉద్యోగి ఆ ప్రసిద్ధ కంపెనీలో చేరి కేవలం ఆరు నెలలే అయింది.
తన పోస్ట్‌లో, “నా మహిళా పై అధికారి ఫైళ్లపై సంతకం చేసేటప్పుడు నన్ను నిరంతరం తాకుతున్నారు. మొదట్లో అది పొరపాటున జరిగిందని అనుకున్నాను, కానీ ఇప్పుడు అది తరచుగా జరుగుతోంది” అని అతను బాధతో తెలియజేశాడు. అంతేకాకుండా, ఆ పై అధికారి తనకు దగ్గరగా కూర్చుని తనను ఉసిగొల్పడానికి ప్రయత్నిస్తున్నారని, తన శరీర భాగాలను తాకి నవ్వుకుంటూ జోకులు చెబుతున్నారని ఆ పోస్ట్‌లో ఆరోపించాడు.
ఆ మహిళా అధికారికి పెళ్లై, పిల్లలతో ఉంటున్నారని ఆ యువకుడు చెప్పాడు. ఆరు నెలలు మాత్రమే అయినందున, ఉద్యోగాన్ని మార్చలేక, సహోద్యోగులను విభాగం మార్పు గురించి అడిగితే, “పై అధికారులు మీ జీవితాన్ని పీడకలగా మారుస్తారు” అని చెప్పి సహాయం చేయడానికి నిరాకరించారని ఆ ఉద్యోగి ఆవేదన వ్యక్తం చేశాడు. ఈ వేధింపుల వల్ల తన జీవితం నరకప్రాయంగా మారిందని చెబుతూ, ఎవరికి ఫిర్యాదు చేయాలని ఆ యువకుడు సలహా కోరాడు.
ఈ విషయం కార్యాలయాల్లో లైంగిక వేధింపుల గురించి పెద్ద చర్చకు దారితీసింది. ఒక యూజర్, “మీరు పురుషులు కాబట్టి 98 శాతం మంది మీరు అబద్ధం చెబుతున్నారని భావిస్తారు” అని వ్యాఖ్యానించగా, మరికొందరు “ఉద్యోగం మానేయండి” లేదా “ఆమె చర్యలకు స్పందించవద్దు” అని సలహా ఇచ్చారు. భారతదేశంలో ‘పని ప్రదేశాల్లో మహిళలపై లైంగిక వేధింపుల చట్టం, 2013’ అమలులో ఉన్నప్పటికీ, పురుషులకు లైంగిక వేధింపులు జరిగినప్పుడు చట్టపరమైన మద్దతు తక్కువగా ఉండటం ఇక్కడ గమనార్హం.