మీరట్: ఉదయాన్నే భయంకరమైన దృశ్యం. దుకాణం ముందు శవం! ఈ దేహం ఎవరిది? అని చూసి దుకాణదారుడి గుండె ఒక్కసారిగా గుభేల్మంది! అతనికి తెలిసిన వారెవరూ కాదు. చాలా జాగ్రత్తగా చూసి అతను నిర్ధారించుకున్నాడు. ఆ తరువాత సంఘటన మరింత భయంకరమైనది. ఈ మృతదేహాన్ని ఎవరు వదిలి వెళ్లారు? ఎవరైనా హత్య చేశారా? లేక దుకాణ యజమానిని ఇరికించడానికా…. రకరకాలుగా ఆలోచించి సీసీటీవీ ఫుటేజీని పరిశీలించాడు.
సీసీటీవీ ఫుటేజీ చూసి కళ్లు బైర్లు కమ్మాయి. రాత్రిపూట కొందరు పోలీసు సిబ్బంది గుట్టు చప్పుడు కాకుండా ఒక దుకాణం ముందు మృతదేహాన్ని పడేసినట్లు ఫుటేజీలో కనిపించింది. వారు వెంటనే ఆ క్లిప్‌ను సోషల్ మీడియాలో విడుదల చేశారు. అది క్షణాల్లో వైరల్ అయ్యింది. నెటిజన్ల మధ్య ఆగ్రహం కట్టలు తెంచుకుంది. చాలా మంది, “ఇది సాధారణ ప్రజల పట్ల స్థానిక పోలీసుల ఉదాసీనత!” అని రాశారు. పోలీసులను ప్రశ్నించగా, మీరట్ ఎస్‌ఎస్‌పి డాక్టర్ విపిన్ టాడా చర్య తీసుకున్నారు. విమర్శల తుఫాను మధ్య, వెంటనే ఎల్-బ్లాక్ పోలీస్ అవుట్‌పోస్ట్ ఇన్‌ఛార్జ్ జితేంద్ర కుమార్ మరియు కానిస్టేబుల్ రాజేష్‌ను సస్పెండ్ చేశారు. హోంగార్డు రోహతాష్‌ను కూడా సస్పెండ్ చేశారు. ఎస్పీ సిటీ ఆయుష్ విక్రమ్ సింగ్ అంతర్గత విచారణ కూడా ప్రారంభించారని టాడా చెప్పారు. ఆ యువకుడి గుర్తింపు ఇంకా తెలియాల్సి ఉంది.
కొంతమంది పోలీసు సిబ్బంది (నౌచాంది పరిధి) గురువారం రాత్రి ఈ మృతదేహాన్ని పడేసినట్లు ఆరోపణలు వచ్చాయి. ఈ సంఘటనలో ఎల్-బ్లాక్ అవుట్‌పోస్ట్ ఇన్‌ఛార్జ్ జితేంద్ర కుమార్ మరియు కానిస్టేబుల్ రాజేష్‌ను సస్పెండ్ చేశారు. పోస్ట్‌మార్టం ప్రక్రియల ఇబ్బందులను నివారించడానికి, వారు మృతదేహాన్ని మరొక పోలీస్ స్టేషన్ పరిధిలో పడేసినట్లు తెలుస్తోంది. ఈ సంఘటన రాత్రి 1:40 గంటల ప్రాంతంలో జరిగింది. లోహియానగర్ పోలీస్ స్టేషన్ పరిధిలోని ఒక స్టేషనరీ దుకాణం వెలుపల ఈ మృతదేహాన్ని పడేశారు. ఆ దుకాణదారుడు మీడియాతో మాట్లాడుతూ, తెల్లవారుజామున తన స్టేషనరీ దుకాణం షట్టర్ ముందు మృతదేహాన్ని చూసినట్లు తెలిపారు. ఉదయం ఇతర దుకాణదారులు కూడా గుమిగూడారు, ఆ తర్వాత పోలీసులకు సమాచారం అందించారు. వారిలో కొందరు సీసీటీవీ ఫుటేజీని పరిశీలించారు. దాని నుండి పోలీసు దుస్తులు ధరించిన కొంతమంది అక్కడ మృతదేహాన్ని పడేసినట్లు తెలిసింది. ఆ తర్వాతే వీడియోను సోషల్ మీడియాలో పోస్ట్ చేశారు. ఈ విషయాన్ని స్థానిక పోలీస్ స్టేషన్‌కు తెలియజేశారు.