అమెరికా కోర్టుల్లో ఇటీవల ఒక వింతైన ధోరణి కనిపిస్తోంది. చైనాకు చెందిన అత్యంత ధనవంతులు అమెరికాలోని సరళమైన అద్దె గర్భం (Surrogacy) చట్టాలను ఉపయోగించుకుని డజన్ల కొద్దీ, కొన్ని సందర్భాల్లో వందల సంఖ్యలో పిల్లలను కంటున్నట్లు వెల్లడైంది. ఇది కేవలం ఒక కుటుంబాన్ని నిర్మించుకోవడమే కాకుండా, ఒక వ్యాపార ప్రయోజనం కోసం పిల్లలను ‘తయారు చేసే’ ప్రక్రియగా మారుతుండటం ఆందోళన కలిగిస్తోంది.
ఒక్క వ్యక్తి.. 20 మంది కొడుకులు!
ఒక వింత కేసులో, చైనాకు చెందిన ఒక టెక్నాలజీ బిలియనీర్ వీడియో కాన్ఫరెన్స్ ద్వారా అమెరికా కోర్టుకు హాజరై.. తనకు కనీసం 20 మంది పిల్లలు కావాలని తన కోరికను వెల్లడించాడు. ఆశ్చర్యకరమైన విషయం ఏమిటంటే, ఈ పిల్లలందరూ మగ పిల్లలే అయి ఉండాలని అతను కండిషన్ పెట్టాడు. తన భారీ వ్యాపార సామ్రాజ్యాన్ని భవిష్యత్తులో చూసుకోవడానికి వారసుల సైన్యం కావాలనే ఉద్దేశంతోనే ఈ వింత ప్రయత్నం చేస్తున్నట్లు అతను తెలిపాడు.
అతను అద్దె గర్భం ద్వారా ఇప్పటికే కన్న కొందరు పిల్లలు కాలిఫోర్నియాలో నర్సుల పర్యవేక్షణలో పెరుగుతుండటాన్ని గమనించిన జడ్జి తీవ్రంగా స్పందించారు. “అద్దె గర్భం అనేది సంతానం లేని వారికి సాయం చేయాలి కానీ, వారసులను భారీగా ఉత్పత్తి చేసే ఫ్యాక్టరీలా మారకూడదు” అని మందలించారు. ఒక అరుదైన చర్యగా ఆ పిల్లలకు తండ్రిగా ఉండే హక్కును కోర్టు నిరాకరించడంతో, ఆ పిల్లల చట్టపరమైన పరిస్థితి ఇప్పుడు ప్రశ్నార్థకంగా మారింది.
ఒక భారీ నెట్‌వర్క్:
ఈ ఘటనతో అమెరికాలో సంతానోత్పత్తి (Fertility) అనేది ఒక పెద్ద వ్యాపారంగా ఎదిగిందని అర్థమవుతోంది. దీని కోసం ప్రత్యేకంగా IVF క్లినిక్‌లు, సరోగసీ ఏజెన్సీలు, న్యాయ సంస్థలు ఒక మాఫియా లాగా పనిచేస్తున్నాయి. కనీసం ఒక్కసారి కూడా అమెరికా రాకుండానే విదేశీ కస్టమర్లకు ఈ సేవలు అందిస్తున్నారు. ఒక బిడ్డను కనడానికి సుమారు 2,00,000 డాలర్లు (దాదాపు ₹1.6 కోట్లు) వరకు వసూలు చేస్తున్నట్లు సమాచారం.
చైనాలో అద్దె గర్భంపై నిషేధం ఉన్నందున, అక్కడి ధనవంతులు అమెరికాను వేదికగా చేసుకుంటున్నారు. అమెరికాలోని చాలా రాష్ట్రాల్లో విదేశీయులు అద్దె గర్భం పొందడంపై ఎటువంటి కఠినమైన ఆంక్షలు లేకపోవడం వీరికి వరంగా మారింది. ఏ విధమైన పర్యవేక్షణ లేకపోవడం వల్ల, ఒకే వ్యక్తి వేర్వేరు రాష్ట్రాల్లో రహస్యంగా ఎంతమంది అద్దె తల్లులనైనా నియమించుకోవచ్చని విమర్శకులు హెచ్చరిస్తున్నారు.