మధ్యతరగతి ప్రజలకు సొంత ఇల్లు ఉండాలని, కారు కొనాలని, దేశ విదేశాలు చుట్టేయాలని కోరికలు ఉంటాయి. పైసా పైసా పోగు చేసి, అప్పులు చేసి మరీ ఈ కోరికలను తీర్చుకోవడానికి ప్రయత్నిస్తారు. చాలామంది తాము కొనుగోలు చేసే వస్తువులనే ‘ఆస్తులు’ (Assets) అని భ్రమిస్తారు. కానీ నిజానికి అవి ఆస్తులు కావు, అవి బాధ్యతలు లేదా అప్పులు (Liabilities).
ఏ వస్తువు అయితే మనకు తిరిగి డబ్బు సంపాదిస్తుందో, దానిపై పెట్టుబడి పెడితేనే మనం ధనవంతులం కాగలము. అలా కాకుండా, ఒక వస్తువును తెచ్చి దాని నిర్వహణ కోసం మళ్లీ మళ్లీ మన జేబులో నుండి డబ్బు ఖర్చు పెడుతుంటే, అది మనల్ని ఎప్పటికీ ధనవంతులను చేయదు.
మధ్యతరగతి ప్రజలు ఆస్తి అని పొరబడి పెట్టుబడి పెట్టే 5 ముఖ్యమైన విషయాల గురించి ఇక్కడ తెలుసుకుందాం.
ఆస్తి (Asset) vs బాధ్యత (Liability) – తేడా ఏంటి?
- ఆస్తి (Asset): ఇది ఒక వ్యక్తికి లేదా సంస్థకు విలువను చేకూరుస్తుంది మరియు భవిష్యత్తులో లాభాన్ని (Cash Flow) అందిస్తుంది. ఉదాహరణకు: నగదు, అద్దెకు ఇచ్చిన భవనం, స్టాక్ మార్కెట్ పెట్టుబడులు.
- బాధ్యత (Liability): ఇది అప్పు లేదా భవిష్యత్తులో మనం చెల్లించాల్సిన ఆర్థిక భారం. ఉదాహరణకు: అప్పులు, క్రెడిట్ కార్డ్ బిల్లులు, నిర్వహణ ఖర్చులు పెంచే వస్తువులు.
మధ్యతరగతి వారు ఆస్తి అని పొరబడే అంశాలు:
1. సొంత ఇల్లు
ప్రతి మధ్యతరగతి వ్యక్తి కల సొంత ఇల్లు. ఇల్లు కడితే అది ఆస్తి అవుతుందని భావించి పొదుపు చేసిన డబ్బుతో పాటు భారీగా హోమ్ లోన్లు తీసుకుంటారు. కానీ మీరు నివసించే ఇల్లు నిజానికి ఒక ‘లయబిలిటీ’. ఎందుకంటే:
- బ్యాంకులు వడ్డీ రేట్లు పెంచినప్పుడు మీరు కట్టే EMI పెరుగుతుంది.
- ఇంటి నిర్వహణ ఖర్చులు (Maintenance) మీ జేబు నుండే వెళ్తాయి.
- గమనిక: అదే ఇల్లు మీరు అద్దెకు ఇచ్చినా లేదా లాభానికి విక్రయించినా అప్పుడు అది ఆస్తి అవుతుంది. కానీ మీరు నివసిస్తున్నంత కాలం అది మీ జేబులో నుండి డబ్బును ఖర్చు చేయిస్తుంది.
2. అప్పు చేసి కొనే కొత్త కారు
ఇల్లు, కారు ఉంటేనే హోదా అని మనం అనుకుంటాం. కానీ కారు ఎన్నటికీ ఆస్తి కాదు. కారు కొన్న తర్వాత దాని నుండి ఆదాయం రాదు సగటున; బదులుగా సర్వీసింగ్, ఇన్సూరెన్స్, ఇంధనం కోసం మీ జేబు నుండి డబ్బు ఖర్చవుతుంది. భూమి అమ్మి కారు కొనవచ్చు కానీ, కారు అమ్మి భూమిని కొనలేము. ఇది కేవలం విలాసానికి మాత్రమే.
3. కొన్ని రకాల కాలేజీ డిగ్రీలు
అన్ని డిగ్రీలు అధిక ఆదాయాన్ని గ్యారెంటీ ఇవ్వవు. మీరు పెట్టిన ఖర్చు కంటే మీ సంపాదన పెరగకపోతే, ఆ డిగ్రీ ఒక భారంగా మారుతుంది. ముఖ్యంగా భారీగా స్టూడెంట్ లోన్లు తీసుకుని, తక్కువ జీతం వచ్చే రంగాలలో డిగ్రీలు చేయడం ఆస్తి అనిపించుకోదు.
4. టైమ్‌షేర్ (Timeshare)
టైమ్‌షేర్ అంటే ఒక రిసార్ట్ లేదా అపార్ట్‌మెంట్‌లోని భాగాన్ని నిర్ణీత కాలం పాటు వాడుకోవడానికి అనేకమందితో కలిసి ఒప్పందం చేసుకోవడం. ఇది సెలవుల సమయంలో సౌకర్యంగా ఉన్నప్పటికీ, దీనికి భారీ ముందస్తు ఖర్చులు మరియు ఏటా నిర్వహణ ఫీజులు చెల్లించాల్సి ఉంటుంది. ఇది మీ సంపదను పెంచదు, కేవలం ఖర్చును పెంచుతుంది.
5. హోల్ లైఫ్ ఇన్సూరెన్స్ (Whole Life Insurance)
భద్రత మరియు పొదుపు రెండూ ఉంటాయని మధ్యతరగతి వారు వీటిని ఇష్టపడతారు. కానీ పెట్టుబడి పరంగా ఇది సరైనది కాదు. ఇందులో ప్రీమియంలు ఎక్కువగా ఉంటాయి మరియు వచ్చే లాభం (Returns) చాలా తక్కువగా ఉంటుంది. ఇది మీ పెట్టుబడిని చాలా కాలం పాటు లాక్ చేస్తుంది. ఇన్సూరెన్స్‌ను ఇన్సూరెన్స్‌లాగా, పెట్టుబడిని పెట్టుబడిలాగా వేరుగా చూడటమే ఉత్తమం.