రోజూ వాట్సాప్ స్టేటస్‌లు, ఇన్‌స్టాగ్రామ్ రీల్స్ చూడటం మనలో చాలామందికి అలవాటు. అప్పుడప్పుడు కొన్ని వీడియోలు మనల్ని విపరీతంగా ఆకట్టుకుంటాయి. అలాంటి ఒక వీడియోనే ఇప్పుడు సోషల్ మీడియాలో వైరల్ అవుతోంది. ఒక స్కూల్ అసెంబ్లీలో ఒక చిన్నారి చేసిన పని, “అయ్యో.. మనం ఇలాంటి ప్రశాంతతను ఎప్పుడో కోల్పోయామే” అని పెద్దలు నిట్టూర్చేలా చేస్తోంది.
ప్రార్థనలో పరవశం:
అది ఒక చలికాలపు ఉదయం. స్కూల్ యూనిఫాం, స్వెటర్లు ధరించి విద్యార్థులందరూ వరుసలో నిలబడి ఉన్నారు. ప్రార్థన గీతం ప్లే అవుతోంది. సాధారణంగా అసెంబ్లీ అంటే “ఎప్పుడెప్పుడు అయిపోతుందా, క్లాసులోకి వెళ్లి కూర్చుందామా” అని చాలామంది విద్యార్థులు అనుకుంటారు. మరికొందరు టీచర్లకు భయపడి బిగుసుకుపోయి నిలబడతారు. కానీ ఈ వీడియోలో ఉన్న ఒక చిన్నారి మాత్రం తనదైన ప్రపంచంలో ఉన్నాడు.
కళ్లు మూసుకుని, చేతులు జోడించి, వెనుక వినిపిస్తున్న ఆ ప్రార్థన గీతానికి అనుగుణంగా తన శరీరాన్ని అటు ఇటు ఊపుతూ తన్మయత్వంతో మునిగిపోయాడు. అది సినిమా డ్యాన్స్ కాదు, ఎవరికో చూపించాలని చేస్తున్న పని కాదు. ఆ పాటలోని అర్థంలో, సంగీతంలో తనను తాను మర్చిపోయి ఒకవిధమైన పరవశ స్థితిలో ఉన్నాడు. తన చుట్టూ ఏం జరుగుతుందో కూడా అతనికి తెలియదు.
మనల్ని ఎందుకు కదిలిస్తోంది?
ఈ వీడియో చూస్తున్న ప్రతి ఒక్కరూ ఎందుకు భావోద్వేగానికి లోనవుతున్నారంటే.. దానికి కారణం ఆ చిన్నారిలోని ‘నిష్కల్మషత్వం’. మనం ఎదుగుతున్న కొద్దీ “నలుగురు ఏమనుకుంటారు?” అనే భయంలో మన సహజమైన సంతోషాలను కోల్పోతున్నాం. చివరికి దేవుడిని మొలవడంలో కూడా ఒక యాంత్రికత వచ్చేసింది. కానీ ఆ పిల్లోడికి తనను ఎవరైనా వీడియో తీస్తున్నారనో, ఇతరులు చూస్తున్నారనో ఎలాంటి ఆందోళన లేదు. అతని ముఖ కవళికలు ఎటువంటి కల్తీ లేని స్వచ్ఛమైన భక్తిని, ఆనందాన్ని వ్యక్తపరుస్తున్నాయి.
ఆ టీచర్‌కు హ్యాట్సాఫ్!
సాధారణంగా స్కూళ్లలో వరుసలో నిలబడినప్పుడు తల అటు ఇటు తిప్పితేనే టీచర్లు “స్ట్రైట్‌గా నిలబడు” అని గద్దిస్తారు. కానీ ఈ అబ్బాయి ఇలా తన్మయత్వంతో ఊగుతున్నా ఆపకుండా, దానిని ఆస్వాదిస్తూ వీడియో తీసిన ఆ టీచర్‌ను ఖచ్చితంగా అభినందించాల్సిందే. చదువు, మార్కులతో పాటు ఒక బిడ్డలోని భావోద్వేగాలకు, ఆనందానికి ఆ పాఠశాల విలువనిస్తోందని దీని ద్వారా అర్థమవుతోంది. భయపెట్టని చోటనే పిల్లలు పువ్వుల్లా వికసిస్తారనడానికి ఇదే నిదర్శనం.
ఎప్పుడైనా ఈ ప్రపంచాన్ని మర్చిపోయి, మనల్ని మనం ఆస్వాదిస్తూ ఆ చిన్నారిలా మారిపోవాలి. ఎండిపోయిన మన మనసులను ఆ చిన్నారి పసితనం తడిపిందనే చెప్పాలి!