జమ్మూ కాశ్మీర్ హైడ్రో ఎలక్ట్రిక్ ప్రాజెక్ట్: కిష్త్వార్‌లో నిర్మాణంలో ఉన్న 850 మెగావాట్ల **’రత్లే హైడ్రో ఎలక్ట్రిక్ ప్రాజెక్ట్’**కు సంబంధించి అత్యంత సున్నితమైన సమాచారం వెలుగులోకి వచ్చింది. ఈ ప్రాజెక్టులో పనిచేస్తున్న 29 మందికి ఉగ్రవాద సంబంధాలు లేదా నేర చరిత్ర ఉన్నట్లు పోలీసులు హెచ్చరించడం తీవ్ర చర్చకు దారితీసింది.
కిష్త్వార్ బీజేపీ ఎమ్మెల్యే శగున్ పరిహార్ ఈ ప్రాజెక్టులో నియమించబడిన కార్మికుల నేపథ్యంపై గతంలోనే ప్రశ్నలు లేవనెత్తారు. ఇప్పుడు పోలీసుల హెచ్చరిక ఆమె ఆరోపణలను బలపరిచినట్లయింది.
నవంబర్ 1న జమ్మూ కాశ్మీర్ పోలీసులు ‘మేఘా ఇంజనీరింగ్ అండ్ ఇన్‌ఫ్రాస్ట్రక్చర్ లిమిటెడ్’ (MEIL) సంస్థకు లేఖ రాశారు. ద్రబ్శాలా ప్రాంతంలో జరుగుతున్న ఈ కీలక ప్రాజెక్టులో పనిచేస్తున్న 29 మంది దేశ వ్యతిరేక కార్యకలాపాల్లో పాలుపంచుకున్నట్లు తమ తనిఖీల్లో తేలిందని హెచ్చరించారు.
ఉద్యోగుల నియామకంపై పునరాలోచన
సీనియర్ సూపరింటెండెంట్ ఆఫ్ పోలీస్ (SSP) నరేష్ సింగ్ MEIL జనరల్ మేనేజర్‌కు పంపిన లేఖలో ఈ 29 మంది జాబితాను జతపరిచారు. జలవిద్యుత్ ప్రాజెక్టులు జాతీయ ప్రాధాన్యత కలిగినవని, శత్రు దేశాలకు ఇవి ప్రధాన లక్ష్యాలుగా ఉంటాయని ఆయన గుర్తుచేశారు. కాబట్టి ఇలాంటి వ్యక్తుల నియామకంపై పునరాలోచించాలని కోరారు.
- ఈ 29 మందిలో ఐదుగురికి ఉగ్రవాద సంబంధాలు ఉన్నట్లు తేలింది. వీరిలో ఒక పాత ఉగ్రవాది బంధువులు ముగ్గురు, ఒక అనుమానిత ఓవర్‌గ్రౌండ్ వర్కర్ కుమారుడు మరియు ఒక లొంగిపోయిన ఉగ్రవాది కుమారుడు ఉన్నారు.
- ఒక వ్యక్తిపై నీటి వనరులను కలుషితం చేయడం మరియు పత్రాల ఫోర్జరీ ఆరోపణలు ఉన్నాయి.
- మిగిలిన 23 మందిపై ప్రజా ఆస్తులను ధ్వంసం చేయడం వంటి నేర చరిత్ర ఉంది.
కంపెనీ వివరణ
ఈ వివాదంపై MEIL చీఫ్ ఆపరేటింగ్ ఆఫీసర్ (COO) హర్పాల్ సింగ్ మాట్లాడుతూ.. ఎమ్మెల్యే శగున్ పరిహార్ తమపై ఒత్తిడి తెస్తున్నారని, తన మనుషులకు ఉద్యోగాలు ఇవ్వాలని కోరుతున్నారని ఆరోపించారు. అయితే, పోలీసుల హెచ్చరిక లేఖ అందినట్లు ఆయన అంగీకరించారు. ఆ 29 మందిని తొలగించడంపై ఆయన స్పందిస్తూ—”ఏ చట్టం కింద వారిని తీసివేయాలి? ఒక వ్యక్తి తండ్రి లేదా బంధువు ఉగ్రవాది అయితే ఆ వ్యక్తి చేసిన నేరం ఏమిటి? కోర్టులో నేరం నిరూపణ కాకుండా చర్యలు తీసుకుంటే వారు కోర్టుకు వెళ్లే అవకాశం ఉంది, ఇది కంపెనీకి కొత్త సమస్యలను తెస్తుంది” అని పేర్కొన్నారు. ప్రస్తుతానికి వారిపై నిఘా ఉంచుతామని ఆయన తెలిపారు.