హరీష్ రాణా కరుణామరణం కేసు: గాజియాబాద్‌కు చెందిన హరీష్ రాణా అనే యువకుడికి కరుణామరణం ప్రసాదించాలని కోరుతున్న తల్లిదండ్రులతో సుప్రీంకోర్టు స్వయంగా మాట్లాడాలని నిర్ణయించుకుంది. ఎయిమ్స్ (AIIMS) వైద్య నివేదికను పరిశీలించిన తర్వాత అత్యున్నత న్యాయస్థానం స్పందిస్తూ— “ఇక మనం ఏదో ఒకటి చేయాలి, అతడిని ఇలాగే బతకనివ్వలేము” అని వ్యాఖ్యానించింది.
ఈ నేపథ్యంలో, హరీష్ తల్లిదండ్రులు నిర్మలా రాణా, అశోక్ రాణాలను జనవరి 13న కోర్టుకు పిలిపించింది. వారి కుమారుడికి ‘పాసివ్ యూథనేసియా’ (Passive Euthanasia) ఇచ్చే అంశంపై ధర్మాసనం వారితో వ్యక్తిగతంగా చర్చించనుంది.
జస్టిస్ జె.బి. పార్దీవాలా, జస్టిస్ కె.వి. విశ్వనాథన్‌లతో కూడిన ధర్మాసనం ఈ ఆదేశాలు జారీ చేసింది. 31 ఏళ్ల హరీష్ రాణా గత 13 ఏళ్లుగా అపస్మారక స్థితిలో (Vegetative State) మంచానికే పరిమితమై ఉన్నాడు. ఇన్నేళ్లుగా కదలకుండా పడుకుని ఉండటం వల్ల అతడి శరీరమంతా పుండ్లు పడిపోయాయని తల్లిదండ్రులు తమ పిటిషన్‌లో ఆవేదన వ్యక్తం చేశారు.
వైద్య నివేదికలు ఏం చెబుతున్నాయి?
ఎయిమ్స్ (AIIMS) రెండవ మెడికల్ రిపోర్టులో హరీష్ కోలుకునే అవకాశాలు ‘సున్నా’ అని స్పష్టం చేసింది. అంతకుముందు నోయిడా జిల్లా ఆసుపత్రి నివేదిక కూడా అతడి పరిస్థితి అత్యంత దయనీయంగా ఉందని పేర్కొంది. హరీష్ శ్వాస తీసుకోవడానికి గొంతులో ట్యూబ్, ఆహారం కోసం కడుపులో ట్యూబ్ అమర్చారు.
సుప్రీంకోర్టు ధర్మాసనం మాట్లాడుతూ.. “మేము ఒక తుది నిర్ణయానికి రావాల్సిన స్థితికి చేరుకున్నాం. ఈ నివేదిక చాలా బాధాకరంగా ఉంది. మాకు కూడా ఇది కఠినమైన నిర్ణయమే, కానీ ఆ అబ్బాయిని ఎప్పటికీ ఇదే స్థితిలో ఉంచలేము” అని లాయర్లతో వ్యాఖ్యానించింది.
అసలేం జరిగింది?
20 ఆగస్టు 2013న పంజాబ్ యూనివర్సిటీలో బీటెక్ చదువుతున్న సమయంలో హరీష్ రాణా తాను ఉంటున్న పీజీ (PG) నాలుగో అంతస్తు నుండి కింద పడిపోయాడు. తలకు తీవ్రమైన గాయం కావడంతో అనేక ఆసుపత్రుల్లో చికిత్స పొందినా కోలుకోలేక ‘వెజిటేటివ్ స్టేజ్’లోకి వెళ్లిపోయాడు. కొడుకు పడుతున్న నరకం చూడలేక, తమ తర్వాత అతడిని చూసుకునేవారు లేరనే ఆవేదనతో తల్లిదండ్రులు ఈ కరుణామరణం కోరుతున్నారు.
‘పాసివ్ యూథనేసియా’ అంటే ఏమిటి?
పాసివ్ యూథనేసియా (నిష్క్రియ ఇచ్ఛామరణం)లో రోగికి అమర్చిన కృత్రిమ జీవ రక్షక వ్యవస్థలను (Artificial Life Support) తొలగిస్తారు. దీనివల్ల రోగి సహజంగా మరణిస్తాడు. మెడికల్ బోర్డు నివేదికలు అన్నీ ఒకేలా ఉన్నప్పుడు మాత్రమే కోర్టు ఇందుకు అనుమతి ఇస్తుంది.