ఉత్తరప్రదేశ్‌లోని భదోహిలో నిర్వహించిన విరాట్ హిందూ సమ్మేళనంలో రాష్ట్ర మహిళా కమిషన్ ఉపాధ్యక్షురాలు, బీజేపీ నాయకురాలు అపర్ణ బిష్త్ యాదవ్ చేసిన వ్యాఖ్యలు రాజకీయ ప్రకంపనలు సృష్టిస్తున్నాయి. వేదికపై నుండి ఆమె గర్జిస్తూ.. “దేశంలో పథకాలు రాముడి పేరు మీద కాకపోతే, అల్లా పేరు మీద నడుస్తాయా?” అని సూటిగా ప్రశ్నించారు. హిందుత్వం మరియు జాతీయవాదంపై తన గళాన్ని వినిపిస్తూ, సమాజ రక్షణ కోసం అవసరమైతే ఆయుధం పట్టడానికి కూడా వెనుకాడబోనని ఆమె పేర్కొన్నారు.
కేంద్ర ప్రభుత్వం ప్రవేశపెట్టిన పథకాల పేర్లపై వస్తున్న విమర్శలకు అపర్ణ యాదవ్ గట్టి సమాధానం ఇచ్చారు. మహాత్మా గాంధీ జాతీయ గ్రామీణ ఉపాధి హామీ పథకం (MGNREGA) వంటి వాటిని ప్రధాని మోదీ భగవంతుడైన రాముడితో జోడించడంపై వామపక్ష భావజాలం ఉన్నవారు, ఢిల్లీలోని కొందరు నాయకులు అనవసర రాజకీయం చేస్తున్నారని మండిపడ్డారు. జాతిపిత మహాత్మా గాంధీ కూడా జీవితాంతం ‘రఘుపతి రాఘవ రాజారామ్’ అంటూ రాముడి నామాన్నే స్మరించారని ఆమె గుర్తు చేశారు. రాముడే భారతదేశానికి ఆదర్శమని, ఇది ‘రామ యుగం’ అని ఆమె స్పష్టం చేశారు.
‘ఒక్కటిగా ఉంటేనే సురక్షితం’ హిందూ సమాజం ఐక్యంగా ఉండాలని అపర్ణ యాదవ్ నొక్కి చెప్పారు. “బంగ్లాదేశ్, పాకిస్థాన్‌లలో హిందువులపై జరుగుతున్న దాడులు, హత్యలు అందరికీ తెలిసినవే. ఇటువంటి పరిస్థితుల్లో హిందూ సమాజం ఒక్కటిగా ఉంటేనే మనల్ని మనం కాపాడుకోగలం” అని ఆమె అన్నారు. ప్రధానమంత్రి నరేంద్ర మోదీ ఇచ్చిన ‘ఏక్ రహేంగే తో సేఫ్ రహేంగే’ (ఒక్కటిగా ఉంటేనే సురక్షితం) మరియు ముఖ్యమంత్రి యోగి ఆదిత్యనాథ్ ఇచ్చిన ‘బటేంగే తో కటేంగే’ (విడిపోతే అంతమైపోతాం) నినాదాలను అమలు చేయాల్సిన సమయం వచ్చిందని ఆమె పిలుపునిచ్చారు.
చొరబాటుదారులపై నిఘా.. ఆయుధాలపై ఆలోచన ఎన్నికల కమిషన్ చేపట్టిన SIR ప్రచారానికి సహకరించాలని ఆమె ప్రజలను కోరారు. ఎక్కడైనా చొరబాటుదారులు కనిపిస్తే వెంటనే పోలీసులకు సమాచారం ఇవ్వాలని, వారిని దేశం నుండి బయటకు పంపాలని సూచించారు. ప్రసంగం ముగింపులో ఆమె భావోద్వేగంగా మాట్లాడుతూ.. “హిందూ సమాజం ఇప్పుడు అప్రమత్తంగా ఉండాలి. సమాజ రక్షణ కోసం అవసరమైతే ఆయుధం పట్టడానికి కూడా నేను సిద్ధం” అని ప్రతిజ్ఞ చేశారు. హిందువుల ఐక్యతను చాటిచెప్పేలా ఆమె చేసిన ఈ వ్యాఖ్యలు ఇప్పుడు దేశవ్యాప్తంగా చర్చనీయాంశమయ్యాయి.