డిసెంబర్ 13న గురుగ్రామ్‌లోని మనేసర్ ప్రాంతంలో ఒక యువతి మృతదేహం అర్ధనగ్న స్థితిలో లభ్యమైంది. ఒక పాత రేకుల షెడ్డులో పడి ఉన్న ఈ మృతదేహాన్ని చూసి పోలీసులు దిగ్భ్రాంతికి గురయ్యారు. అప్పటి నుండి క్రైమ్ బ్రాంచ్ పోలీసులు ఈ హత్య కేసును ఛేదించే పనిలో పడ్డారు.
పోలీసుల ముందున్న అతిపెద్ద సవాలు యువతిని గుర్తించడం. దర్యాప్తులో ఆ యువతి ఉత్తరప్రదేశ్‌లోని ఎటా జిల్లాకు చెందిన జ్యోతి (పేరు మార్చబడింది) అని తేలింది. అయితే ఆమెను చంపింది ఎవరో తెలిశాక పోలీసులు సైతం విస్తుపోయారు. తన సొంత అన్నయ్యే తన స్నేహితుడితో కలిసి ఈ దారుణానికి ఒడిగట్టాడని తేలింది.
ముస్లిం యువకుడితో పెళ్లికి సిద్ధపడటమే కారణం: జ్యోతి ఒక ముస్లిం యువకుడిని ప్రేమించింది. ఆమె అన్న రవీంద్రకు ఈ విషయం అస్సలు నచ్చలేదు. చెల్లెలిని ఈ సంబంధం నుండి విడదీయాలని ఎంత ప్రయత్నించినా కుదరలేదు. దీంతో జ్యోతి తన ప్రియుడి కోసం ఇల్లు వదిలి యూపీ నుండి పారిపోయి గురుగ్రామ్‌కు చేరుకుంది. అక్కడే తన ప్రియుడితో కలిసి ఉండటం మొదలుపెట్టింది. తన కుటుంబ గౌరవం పోయిందని భావించిన రవీంద్ర, తన చెల్లెలిని చంపాలని పథకం వేశాడు. ఈ కుట్రలో తన స్నేహితుడు పుష్పేంద్రను భాగస్వామిని చేశాడు.
హత్యకు ముందు పుష్పేంద్ర నీచమైన క్రీడ: ఏసీపీ మనేసర్ తెలిపిన వివరాల ప్రకారం.. రవీంద్ర తన చెల్లెలిని చంపే బాధ్యతను పుష్పేంద్రకు అప్పగించాడు. పుష్పేంద్ర తెలివిగా జ్యోతితో మాటలు కలిపి ఆమె నమ్మకాన్ని చూరగొన్నాడు. డిసెంబర్ 12న ఆమెతో మాట్లాడుతూ.. “నీ పెళ్లికి మీ అన్నయ్యను నేను ఒప్పిస్తాను, నువ్వు ఆ ముస్లిం అబ్బాయినే పెళ్లి చేసుకోవచ్చు” అని నమ్మబలికాడు.
అయితే, అందుకు ప్రతిగా తనతో శారీరక సంబంధం పెట్టుకోవాలని ఆమెను కోరాడు. దీనికి జ్యోతి నిరాకరించి, అతనిపై ఆగ్రహం వ్యక్తం చేసింది. అయినప్పటికీ, ఏదో సాకుతో ఆమెను ఒక ఏకాంత ప్రదేశానికి పిలిపించాడు. అక్కడ ఆమెపై అఘాయిత్యానికి పాల్పడి, ఆపై గొంతు నులిమి హత్య చేశాడు. అనంతరం ఆమె మృతదేహాన్ని అక్కడ పడేసి పారిపోయాడు. ప్రస్తుతం పోలీసులు రవీంద్ర మరియు పుష్పేంద్ర ఇద్దరినీ అరెస్ట్ చేసి జైలుకు పంపారు.