చెన్నైలో మెడికల్ కాలేజీ విద్యార్థినిపై ఒక ఫిజియోథెరపిస్ట్ డాక్టర్ మత్తుమందు కలిపిన పానీయం ఇచ్చి లైంగిక దాడికి పాల్పడిన ఘటన తీవ్ర కలకలం రేపుతోంది. నిందితుడిని పోలీసులు అరెస్ట్ చేశారు.
ఘటన నేపథ్యం: చెన్నైలోని కొడుంగైయూర్ ప్రాంతానికి చెందిన ఒక యువతి, ప్రైవేట్ మెడికల్ కాలేజీలో బి.ఎస్.సి. ఫిజియోథెరపీ నాలుగో సంవత్సరం చదువుతోంది. తన చదువులో భాగంగా పెరంబూరులోని ఒక ప్రముఖ ప్రైవేట్ ఆసుపత్రిలో నెలకు రూ. 4 వేల జీతంతో శిక్షణ (ఇంటర్న్‌షిప్) పొందుతోంది. ఆ ఆసుపత్రి యజమాని అయిన డాక్టర్ కార్తికేయన్ అనే ఫిజియోథెరపిస్ట్ తనపై అత్యాచారం చేశాడని ఆ విద్యార్థిని పోలీసులకు ఫిర్యాదు చేసింది.
మత్తుమందు ఇచ్చి ఘాతుకం: విద్యార్థిని ఫిర్యాదు ప్రకారం.. కొన్ని రోజుల క్రితం ఉదయం 6:30 గంటలకు డాక్టర్ కార్తికేయన్ ఆమెకు ఫోన్ చేసి, ఒక పేషెంట్‌కు అత్యవసర చికిత్స అందించాలని, వెంటనే రావాలని కోరాడు. అది నమ్మిన ఆమె మధ్యాహ్నం 1 గంట సమయంలో ఆసుపత్రికి వెళ్ళింది. అనంతరం ఒక మహిళకు మసాజ్ చేయాలని చెప్పి ఆమెను తన కారులో తీసుకెళ్ళాడు.
దారిలో ఆమెను కాఫీ లేదా టీ తాగుతావా అని అడగ్గా, తనకు ఆ అలవాటు లేదని చెప్పింది. అప్పుడు అతను కారులో ఉన్న కూల్ డ్రింక్ (కోకాకోలా) ఇచ్చాడు. అది తాగిన కొద్ది నిమిషాలకే ఆమెకు తల తిరగడం మొదలై స్పృహ కోల్పోయింది. చాలా సేపటి తర్వాత కళ్ళు తెరిచి చూసేసరికి, ఆమె ఒక అపార్ట్‌మెంట్ గదిలో ఉంది. ఆమె ఒంటిపై బట్టలు లేవు. పక్కనే డాక్టర్ కూడా బట్టలు లేకుండా పడుకుని ఉన్నాడు.
కుటుంబ సభ్యుల ఫిర్యాదు – అరెస్ట్: తీవ్ర దిగ్భ్రాంతికి గురైన ఆమె అక్కడి నుండి తప్పుకుని ఇంటికి చేరుకుంది. అవమాన భారంతో మొదట ఎవరికీ చెప్పలేదు, కానీ మానసిక ఒత్తిడి తట్టుకోలేక తన అక్కకు విషయం చెప్పింది. కుటుంబ సభ్యులు ఆసుపత్రికి వెళ్లి డాక్టర్‌ను నిలదీయగా, అతను అలాంటిదేమీ జరగలేదని బుకాయించాడు.
దీనిపై ఆమె కొలత్తూరు మహిళా పోలీస్ స్టేషన్‌లో ఫిర్యాదు చేయగా, పోలీసులు లోతుగా విచారణ జరిపారు. డాక్టర్ కార్తికేయన్ పథకం ప్రకారమే కూల్ డ్రింక్‌లో మత్తుమందు కలిపి ఉంచాడని, కొలత్తూరు జయంతి నగర్‌లోని ఒక సర్వీస్ అపార్ట్‌మెంట్‌లో ఈ ఘాతుకానికి పాల్పడ్డాడని పోలీసులు నిర్ధారించారు.
నమోదైన కేసులు: పోలీసులు డాక్టర్ కార్తికేయన్‌ను అరెస్ట్ చేసి అతనిపై ఈ క్రింది సెక్షన్ల కింద కేసులు నమోదు చేశారు:
- BNS 123: నేరపూరిత ఉద్దేశంతో విషం లేదా హానికరమైన పదార్థం ఇవ్వడం.
- BNS 63: లైంగిక వేధింపులు/అత్యాచారం.
- BNS 64: అత్యాచారానికి శిక్ష.