బెంగళూరు: సిటీలోని అత్యంత రద్దీగా ఉండే హెబ్బాల్ – గొరగుంటెపాళ్య రింగ్ రోడ్డుపై పంక్చర్ మాఫియా మళ్లీ పడగ విప్పింది. రహదారిపై ఎవరో కావాలని చల్లిన దోసెడు మేకులను ఏరిన ఒక వాహనదారుడు, దానికి సంబంధించిన ఫోటోలు మరియు వీడియోలను సోషల్ మీడియాలో పంచుకున్నారు.
‘కర్ణాటక పోర్ట్‌ఫోలియో’ అనే ఎక్స్ (ట్విట్టర్) పేజీ ఈ ఘటన గురించి పోస్ట్ చేస్తూ.. “దుండగులు రోడ్డుపై ఉద్దేశపూర్వకంగా మేకులను చల్లుతున్నారు. దీనివల్ల వాహనాల టైర్లు పంక్చర్ అయి వాహనదారులు తీవ్ర ఇబ్బందులు పడుతున్నారు. ఆ తర్వాత సమీపంలోని దుకాణాల్లో భారీ ధరలు వసూలు చేసి రిపేర్ చేసే ఒక ముఠా దీని వెనుక చురుగ్గా పనిచేస్తోంది. ప్రయాణికులు జాగ్రత్తగా ఉండాలి” అని హెచ్చరించింది.
రోడ్డు ఎడమవైపు వెళ్లొద్దని సూచన: ఇటీవల ఈ రోడ్డుపై వెళ్తున్న ఒక వ్యక్తి, రహదారికి ఎడమ వైపున పెద్ద సంఖ్యలో మేకులు పడి ఉండటాన్ని గమనించారు. ఆయన స్వయంగా కొన్ని మేకులను సేకరించి, అవి టైర్లను ఎంత వేగంగా చీల్చగలవో చూపిస్తూ ఇతరులను హెచ్చరించారు. ఇది కేవలం ప్రమాదవశాత్తు జరిగింది కాదని, వాహనాలను పంక్చర్ చేయించి దగ్గరలోని రిపేర్ షాపుల ద్వారా డబ్బు వసూలు చేసే క్రమబద్ధమైన మోసం (Scam) అని ఆయన పేర్కొన్నారు. ఇలాంటి చర్యల వల్ల ఆర్థిక నష్టమే కాకుండా, వేగంగా వెళ్లే వాహనాలు ఒక్కసారిగా పంక్చర్ అయితే తీవ్ర ప్రమాదాలు జరిగే అవకాశం కూడా ఉందని ఆందోళన వ్యక్తం చేశారు.
ప్రయాణికుల సలహా: ముఖ్యంగా ద్విచక్ర వాహనదారులు ఈ సమస్య పరిష్కారం అయ్యే వరకు రోడ్డుకు ఎడమ వైపున ప్రయాణించవద్దని ప్రయాణికులు సూచిస్తున్నారు. ఈ ప్రాంతంలో ప్రతిరోజూ ఆఫీసులకు వెళ్లేవారు, సుదూర ప్రాంతాలకు ప్రయాణించే వారు మేకులను గమనించకుండా వాహనాలు నడిపి పంక్చర్ల బారిన పడుతున్నారు.
ఏళ్ల తరబడి సాగుతున్న దందా: గత కొన్నేళ్లుగా ఇలాంటి ఘటనలు పునరావృతమవుతున్నా, ఈ అక్రమాలు ఆగకపోవడంపై నెటిజన్లు మండిపడుతున్నారు. అధికారులు కఠిన చర్యలు తీసుకోవాలని, గస్తీ పెంచాలని మరియు సమీపంలోని పంక్చర్ షాపుల్లో ఆకస్మిక తనిఖీలు నిర్వహించాలని డిమాండ్ చేస్తున్నారు. అనుమానాస్పద కార్యకలాపాలు కనిపిస్తే వెంటనే ట్రాఫిక్ పోలీసులకు నివేదించాలని సోషల్ మీడియాలో విజ్ఞప్తి చేస్తున్నారు.