నేటి కాలంలో మహిళల్లో ఓపిక తగ్గడం వల్ల లేదా ప్రసవానికి ముందు తలెత్తే కొన్ని శారీరక సమస్యల వల్ల సిజేరియన్ ప్రసవాల సంఖ్య బాగా పెరిగింది. సాధారణంగా మొదటి ప్రసవం తర్వాత చాలామంది మహిళలు నడుము నొప్పితో బాధపడుతుంటారు.
నడుము నొప్పి రాగానే చాలామంది మహిళలు ఒక నిర్ణయానికి వచ్చేస్తారు. సిజేరియన్ సమయంలో మత్తు ఇవ్వడానికి (Anesthesia) వెన్నులో ఇచ్చిన ఇంజెక్షన్ వల్లే తమకు ఈ నొప్పి మొదలైందని నమ్ముతుంటారు. మరి నిజంగానే సిజేరియన్ ఇంజెక్షన్ నడుము నొప్పికి ప్రధాన కారణమా? దీనిపై వైద్యులు ఏమంటున్నారో చూద్దాం.
ఇంజెక్షన్ కారణం కాదు! వైద్యులు చెబుతున్న ప్రకారం.. మన జీవితంలో ఏదో ఒక సందర్భంలో శరీరానికి ఎక్కడో ఒక చోట ఇంజెక్షన్ తీసుకునే ఉంటాం. కానీ ఆ ఇంజెక్షన్ తీసుకున్న చోట లేదా ఆ ఎముకలు ఎప్పుడూ నొప్పి పుట్టవు. సిజేరియన్ సమయంలో ఇచ్చే ఇంజెక్షన్ కూడా అంతే. ఆ ఇంజెక్షన్ వల్ల నడుము నొప్పి రాదు. దానికి ఇతర కారణాలు బాధ్యత వహిస్తాయి.
మహిళల్లో నడుము నొప్పికి అసలు కారణాలు:
1. శరీర ఆకృతిలో మార్పు (Body Posture): గర్భధారణ సమయంలో పొట్ట భాగం బరువుగా మారుతుంది. కూర్చునేటప్పుడు, లేచేటప్పుడు, నడిచేటప్పుడు ఆ బరువు అంతా వెన్నెముకపై పడుతుంది. దీనివల్ల తొమ్మిది నెలల కాలంలో మహిళల శరీర ఆకృతి (Body Posture) మారిపోతుంది. ఈ తప్పుడు పోశ్చర్ కారణంగా ప్రసవం తర్వాత చాలా కాలం పాటు నడుము నొప్పి వేధిస్తుంది.
2. తల్లి పాలు ఇచ్చే పద్ధతి (Breastfeeding Position): ప్రసవం తర్వాత బిడ్డకు పాలు ఇచ్చే సమయంలో చాలామంది మహిళలు తప్పుడు పొజిషన్‌లో కూర్చుంటారు. ముందుకు వంగి కూర్చోవడం, వెన్నుకు సరైన ఆధారం (Support) లేకపోవడం వల్ల వెన్నెముకపై ఒత్తిడి పడి నడుము నొప్పి మొదలవుతుంది.
3. క్యాల్షియం లోపం: గర్భధారణ సమయంలో మరియు ప్రసవం తర్వాత కూడా మహిళల ఆహారంలో క్యాల్షియం లోపం ఉంటే అది నడుము నొప్పికి దారితీస్తుంది. అందుకే ప్రసవం తర్వాత కనీసం మూడు నెలల పాటు డాక్టర్లు సూచించిన క్యాల్షియం సప్లిమెంట్లను ఖచ్చితంగా వాడాలి.