ముంబైలో ఉదయం టిఫిన్ చేసి, కేవలం రెండు గంటల తర్వాత దుబాయ్‌లో లంచ్ చేయవచ్చని ఎవరైనా చెబితే అది సైన్స్ ఫిక్షన్ సినిమా కథలా అనిపించవచ్చు. కానీ భారత్ – యూఏఈ (UAE) మధ్య నిర్మించతలపెట్టిన ఒక భారీ మౌలిక సదుపాయాల ప్రాజెక్ట్ ఈ కలను నిజం చేయబోతోంది.
ఈ అండర్ వాటర్ ట్రైన్ ప్రాజెక్ట్ ఏమిటి? ప్రస్తుతం సోషల్ మీడియాలో వైరల్ అవుతున్న వీడియోల ప్రకారం, ‘డీప్ బ్లూ ఎక్స్‌ప్రెస్’ పేరుతో పిలిచే ఈ రైలు అరేబియా సముద్రం అడుగున నిర్మించే సొరంగం ద్వారా భారత్ మరియు యూఏఈలను కలుపుతుంది. ఈ రైలు గంటకు 600 నుండి 1000 కిలోమీటర్ల వేగంతో ప్రయాణిస్తుందని సమాచారం. అంటే విమానాల కంటే కూడా వేగంగా ఇది దూసుకుపోతుంది.
ప్రయాణికులకు ఒక వింత అనుభవం: సముద్ర మట్టానికి సుమారు 200 మీటర్ల లోతులో ఈ ప్రయాణం సాగుతుంది. ఈ రైలు సొరంగం గోడలకు పారదర్శకమైన (Panoramic) కిటికీలు అమర్చడం వల్ల ప్రయాణికులు సముద్రంలోని షార్క్ చేపలు, తిమింగలాలు మరియు ఇతర జీవులను ప్రత్యక్షంగా చూడవచ్చు. ఇది ప్రపంచంలోనే అతిపెద్ద అండర్ వాటర్ అక్వేరియంలో ప్రయాణిస్తున్న అనుభూతిని కలిగిస్తుంది.
వ్యాపార మరియు ఆర్థిక ప్రయోజనాలు: ఈ ప్రాజెక్ట్ కేవలం ప్రయాణికుల కోసం మాత్రమే కాదు. దీని ద్వారా రెండు దేశాల మధ్య వనరుల మార్పిడి కూడా జరుగుతుంది:
- చమురు రవాణా: దుబాయ్ నుండి భారత్‌కు ముడి చమురును ఈ సొరంగం ద్వారా పంపిస్తారు.
- నీటి రవాణా: భారత్ నుండి దుబాయ్‌కు స్వచ్ఛమైన తాజా నీటిని తరలిస్తారు.
ఈ ప్రాజెక్ట్ విలువ సుమారు 50 బిలియన్ డాలర్లు (రూ. 4 లక్షల కోట్ల కంటే ఎక్కువ) అని అంచనా. దీనివల్ల 50 వేల ఉద్యోగాలు లభిస్తాయని, ప్రయాణ ఖర్చులు 60 శాతం వరకు తగ్గుతాయని భావిస్తున్నారు.
ప్రయాణ సమయం: ప్రస్తుతం ముంబై నుండి దుబాయ్‌కి విమానంలో వెళ్లడానికి 3 నుండి 3.5 గంటల సమయం పడుతుంది. కానీ ఈ రైలు అందుబాటులోకి వస్తే కేవలం రెండు గంటల్లోనే చేరుకోవచ్చు. ఈ ప్రాజెక్ట్ 2030 నాటికి పట్టాలెక్కే అవకాశం ఉందని నివేదికలు చెబుతున్నాయి.