చెన్నై శివార్లలోని కున్రత్తూరు సమీపంలోని మూన్రామ్ కట్టలై ప్రాంతంలో అద్దె ఇంట్లో నివసిస్తున్న విజయ్ (25), యువశ్రీ (24) అనే సాఫ్ట్‌వేర్ ఇంజనీర్ల విషాదాంతం స్థానికంగా కలకలం రేపింది. ప్రేమ వివాహం చేసుకున్న కేవలం 9 రోజులకే వారు ఇలాంటి దారుణ స్థితిలో కనిపించడం అందరినీ దిగ్భ్రాంతికి గురిచేసింది.
అసలేం జరిగింది?: విజయ్, యువశ్రీ ఇద్దరూ ఒకే ఐటీ కంపెనీలో పనిచేస్తూ ప్రేమలో పడ్డారు. వీరిద్దరూ ఈ నెల 13న వివాహం చేసుకుని కున్రత్తూరులోని దళపతి వీధిలో కాపురం పెట్టారు. నిన్న రాత్రి యువశ్రీ సోదరి వారిని చూడటానికి రాగా, లోపల నుండి తలుపులు తీయలేదు. ఎంత పిలిచినా స్పందన లేకపోవడంతో ఆమె పోలీసులకు సమాచారం అందించారు. పోలీసులు తలుపులు పగులగొట్టి లోపలికి వెళ్లి చూడగా.. బెడ్‌పై యువశ్రీ శవమై పడి ఉండగా, విజయ్ ఫ్యాన్‌కు ఉరివేసుకుని వేలాడుతూ కనిపించాడు.
పోలీసుల అనుమానం: దంపతుల మధ్య జరిగిన గొడవ కారణంగా విజయ్ తన భార్య ముఖంపై దిండుతో అదిమి హత్య చేసి, ఆ తర్వాత తను ఆత్మహత్య చేసుకున్నాడా? లేదా మరేదైనా కారణంతో యువశ్రీ ఆత్మహత్య చేసుకుంటే అది చూసి తట్టుకోలేక విజయ్ కూడా తనువు చాలించాడా? అనే కోణంలో పోలీసులు దర్యాప్తు చేస్తున్నారు. మృతదేహాలను పోస్టుమార్టం నిమిత్తం ఆసుపత్రికి తరలించారు.