గుండె అనేది మన శరీరంలో అత్యంత ముఖ్యమైన అవయవం. ఇది నిరంతరం రక్తాన్ని పంపింగ్ చేస్తూ శరీరమంతటికీ ఆక్సిజన్ మరియు పోషకాలను అందిస్తుంది. అందుకే గుండె ఆరోగ్యాన్ని కాపాడుకోవడం చాలా ముఖ్యం. అయితే, ఈ రోజుల్లో చిన్న వయసులోనే చాలా మంది గుండె సమస్యల బారిన పడుతున్నారు. మీ గుండె ఫిట్‌నెస్‌ను తెలుసుకోవడానికి కొలెస్ట్రాల్ లేదా బీపీ పరీక్షలు మాత్రమే సరిపోవు, ‘రెస్టింగ్ హార్ట్ రేట్’ (Resting Heart Rate) అనే సంఖ్యను గమనించాలని డాక్టర్ ఆలోక్ చోప్రా సూచిస్తున్నారు.
రెస్టింగ్ హార్ట్ రేట్ అంటే ఏమిటి? మీరు ఎటువంటి శారీరక శ్రమ లేకుండా, పూర్తిగా ప్రశాంతంగా కూర్చున్నప్పుడు లేదా పడుకున్నప్పుడు మీ గుండె నిమిషానికి ఎన్నిసార్లు కొట్టుకుంటుందో తెలిపే సంఖ్యనే ‘రెస్టింగ్ హార్ట్ రేట్’ అంటారు. ఇది గుండె ఆరోగ్యానికి ఒక ఖచ్చితమైన సూచిక.
ఆరోగ్యకరమైన హార్ట్ రేట్ ఎంత ఉండాలి?
- సాధారణ వ్యక్తులకు: నిమిషానికి 60 నుండి 80 సార్లు కొట్టుకోవడం ఆరోగ్యకరం.
- క్రీడాకారులకు: చాలా ఫిట్‌గా ఉండేవారికి ఇది 40-50 బిట్స్ వరకు కూడా ఉండవచ్చు. ఎందుకంటే వారి గుండె ప్రతి స్పందనలో ఎక్కువ రక్తాన్ని పంప్ చేయగలదు.
హార్ట్ రేట్ ఎక్కువగా ఉంటే అర్థం ఏమిటి? మీ రెస్టింగ్ హార్ట్ రేట్ నిరంతరం ఎక్కువగా ఉంటే, మీ గుండె ఒత్తిడికి గురవుతుందని అర్థం. దీనికి కారణాలు:
- నిద్ర సరిగ్గా లేకపోవడం.
- శరీరంలో నీటి శాతం తగ్గడం (Dehydration).
- మానసిక ఒత్తిడి.
- కెఫీన్ (టీ, కాఫీలు) ఎక్కువగా తీసుకోవడం.
- ఏదైనా ఇతర ఆరోగ్య సమస్యలు ఉండటం.
గుండెను బలంగా మార్చుకోవడం ఎలా?
- రెగ్యులర్ వ్యాయామం: ప్రతిరోజూ కనీసం 30 నిమిషాల నడక లేదా వ్యాయామం చేయండి.
- ధ్యానం: ఒత్తిడి తగ్గించుకోవడానికి మెడిటేషన్ చేయండి.
- నీరు: రోజుకు కనీసం 8 గ్లాసుల నీరు తాగండి.
- ఆహారం: సమతుల్య మరియు పౌష్టికాహారం తీసుకోండి.
- నిద్ర: రోజుకు 7-8 గంటల గాఢ నిద్ర అవసరం.