రాజస్థాన్‌లోని బికనీర్ జిల్లాలో క్షుద్రపూజల పేరుతో ఒక నవవధువుపై జరిగిన అఘాయిత్యం కలకలం రేపుతోంది. బాధితురాలు ఎదుర్కొన్న భయానక పరిస్థితి వింటే ఎవరైనా దిగ్భ్రాంతికి గురవ్వాల్సిందే. తనపై జరిగిన అఘాయిత్యం గురించి డిసెంబర్ మొదటి వారంలో ఆమె ఫిర్యాదు చేసినా, పోలీసులు కేసు నమోదు చేయలేదు. చివరకు బాధితురాలు జిల్లా ఎస్పీని ఆశ్రయించగా, ఆయన ఆదేశాల మేరకు ముగ్గురిపై కేసు నమోదైంది.
ఘటన నేపథ్యం: బాధితురాలికి మే 2025లో వివాహమైంది. పెళ్లయిన కొద్దిరోజులకే అత్తగారి తరపు బంధువు ఒకరు ఇంటికి రావడం మొదలుపెట్టాడు. తాను పెద్ద తాంత్రికుడినని చెప్పుకునేవాడు. క్షుద్రపూజలు, దిష్టి తీయడం పేరుతో ఆమెతో అసభ్యంగా ప్రవర్తించేవాడు. భయపెట్టి ఆమెపై శారీరక దాడికి ప్రయత్నించేవాడు. పరువు పోతుందనే భయంతో ఆమె చాలా కాలం మౌనంగా ఉంది.
సెప్టెంబర్‌లో దారుణం: సెప్టెంబర్ 2025లో నిందితుడు హద్దులు దాటాడు. ఇంట్లోనే ఇతర మహిళలు ఉన్న సమయంలో ఆమెను బలవంతంగా గదిలోకి లాక్కెళ్లి అఘాయిత్యానికి పాల్పడ్డాడు. ఆమె ప్రతిఘటించడంతో ఆమెపై దాడి చేసి, బట్టలు చింపేందుకు ప్రయత్నించాడు.
న్యాయం కోసం పోరాటం: బాధితురాలు ధైర్యం చేసి తన కుటుంబ సభ్యులకు నిజం చెప్పింది. డిసెంబర్ మొదటి వారంలో స్థానిక పోలీస్ స్టేషన్‌లో ఫిర్యాదు చేసినా పట్టించుకోకపోవడంతో, ఆమె ఎస్పీని ఆశ్రయించింది. ఎస్పీ ఆదేశాలతో ఇద్దరు మహిళలతో సహా ముగ్గురిపై పోలీసులు కేసు నమోదు చేసి దర్యాప్తు చేస్తున్నారు.