పాకిస్థాన్ ఇప్పటికే సౌదీ అరేబియాతో ఒక రక్షణ ఒప్పందాన్ని కలిగి ఉంది. దీని ప్రకారం ఒక దేశంపై దాడి జరిగితే, అది రెండో దేశంపై జరిగిన దాడిగానే భావించి పరస్పరం సహకరించుకోవాలి. ఇప్పుడు సరిగ్గా అదే తరహా ఒప్పందాన్ని బంగ్లాదేశ్‌తో కుదుర్చుకోవాలని పాకిస్థాన్ ప్రయత్నిస్తోంది.
కీలక పరిణామాలు: దౌత్య వర్గాల సమాచారం ప్రకారం, పాకిస్థాన్ మరియు బంగ్లాదేశ్ ఒక ఉమ్మడి యంత్రాంగాన్ని (Joint Mechanism) ఏర్పాటు చేశాయి. ఈ బృందం ఒప్పందానికి సంబంధించిన నిబంధనలు మరియు ముసాయిదాను (Draft) సిద్ధం చేస్తుంది. బంగ్లాదేశ్ సైనిక నాయకత్వం కూడా పాకిస్థాన్‌తో వ్యూహాత్మక రక్షణ సహకారంపై ప్రత్యేక ఆసక్తిని కనబరుస్తోంది.
షేక్ హసీనా తర్వాత మారిన సమీకరణాలు: బంగ్లాదేశ్‌లో షేక్ హసీనా ప్రభుత్వం పడిపోయిన తర్వాతే ఈ వేగం పెరిగింది. గతంలో భారత్‌తో సన్నిహితంగా ఉన్న హసీనా హయాంలో పాకిస్థాన్‌తో సంబంధాలు అంతంతమాత్రంగానే ఉండేవి. కానీ ప్రస్తుత తాత్కాలిక ప్రభుత్వ హయాంలో పాకిస్థాన్ తన ‘డిఫెన్స్ డిప్లొమసీ’ని ముమ్మరం చేసింది. ఇప్పటికే ఇరు దేశాల సైనిక అధికారుల మధ్య పలు రౌండ్ల చర్చలు జరిగాయి. శిక్షణ, సామర్థ్య పెంపు వంటి అంశాలపై ఎంఓయూలు (MoUs) కూడా కుదిరాయి.
ఎప్పుడు సంతకం జరగొచ్చు?: బంగ్లాదేశ్‌లో తదుపరి సార్వత్రిక ఎన్నికల తర్వాత ఏర్పడే కొత్త ప్రభుత్వం ఈ రక్షణ ఒప్పందంపై అధికారికంగా సంతకం చేసే అవకాశం ఉందని నిపుణులు భావిస్తున్నారు. ఈ ఒప్పందం గనుక కార్యరూపం దాల్చితే, అది భారతదేశానికి భద్రతా పరంగా కొత్త సవాళ్లను తెచ్చిపెడుతుంది.