తన భర్తను హత్య చేసిన రూబీ అనే మహిళ, పోలీసులు తనపై నేరాన్ని నిరూపించలేరని బహిరంగంగా సవాల్ విసిరింది. జైలుకు వెళ్లే సమయంలో ఆమె పోలీసులతో మాట్లాడుతూ.. “ప్రస్తుతానికి మీరు నన్ను పట్టుకుని ఉండవచ్చు, కానీ కోర్టులో నాపై ఏ నేరాన్ని నిరూపించలేరు” అని ధీమా వ్యక్తం చేసింది.
నేరస్థురాలి వింత తర్కం: రూబీ పోలీసులకు ఇలాంటి సవాల్ విసరడానికి కారణం ఆమె శవాన్ని మాయం చేసిన తీరు. “మీకు కేవలం శరీరంలోని కొన్ని భాగాలు మాత్రమే దొరికాయి. తల, కాళ్ళు, చేతులు ఇంకా దొరకలేదు. అసలు ఆ అవశేషాలు రాహుల్‌వే అని మీరు ఎలా నిరూపిస్తారు?” అని ఆమె ప్రశ్నించింది. పోలీసులు ఎంత ప్రయత్నించినా తల దొరకదని, అది దొరకనంత వరకు తనపై నేరం రుజువు కాదని ఆమె నమ్ముతోంది.
పోలీసుల దర్యాప్తు: గంగా నదిలో పడేసిన శరీర భాగాలు తిరిగి దొరకడం దాదాపు అసాధ్యమని ఎస్పీ కృష్ణ కుమార్ బిష్ణోయ్ అభిప్రాయపడుతున్నారు. నెల రోజులు గడిచిపోవడంతో జలచరాలు వాటిని తినేసి ఉండవచ్చు లేదా నీటి ప్రవాహంలో కొట్టుకుపోయి ఉండవచ్చు. అయితే, పోలీసుల దగ్గర బలమైన ఎలక్ట్రానిక్ మరియు భౌతిక ఆధారాలు ఉన్నాయని వారు చెబుతున్నారు.
DNA పరీక్షే కీలకం: పోలీసులు ప్రస్తుతం DNA పరీక్షపై ఆధారపడుతున్నారు. దొరికిన శరీర భాగాల DNAని, రాహుల్ పిల్లల DNAతో సరిపోల్చడం ద్వారా ఆ అవశేషాలు రాహుల్‌వేనని నిరూపించనున్నారు.
ముందుగా వేసిన మాస్టర్ ప్లాన్: నవంబర్ 22న రూబీ డెహ్రాడూన్ వెళ్లి తన భర్త అద్దెకు ఉంటున్న గదిని ఖాళీ చేయించి సామాన్లన్నీ తీసుకువచ్చింది. అనవసరంగా అద్దె పెరుగుతోందని అప్పుడు ఆమె చెప్పిన మాటలు, ఈ హత్య ముందే రచించిన భారీ కుట్రలో భాగమని పోలీసులు నిర్ధారించారు.