కులంతర వివాహాలు నగరాల్లో సాధారణంగా మారుతున్నా, గ్రామాల్లో ఇంకా కుల వివక్ష, సామాజిక ఒత్తిడి ప్రాణాలను బలి తీసుకుంటూనే ఉన్నాయి. కర్ణాటక రాష్ట్రం ధార్వాడ్ జిల్లాలోని ‘ఇనామ్ వీరాపూర్’ గ్రామంలో జరిగిన ఈ దారుణ ఘటన నాగరిక సమాజాన్ని తలవంచుకునేలా చేస్తోంది.
ప్రేమ వివాహం: ఇనామ్ వీరాపూర్ గ్రామానికి చెందిన వివేకానందన్ మరియు మాన్యా పాటిల్ (20) చిన్ననాటి నుండి స్నేహితులు. కాలేజీ చదువుల సమయంలో వీరి స్నేహం ప్రేమగా మారింది. వివేకానందన్ వేరే కులానికి చెందినవాడు కావడంతో మాన్యా ఇంట్లో తీవ్ర వ్యతిరేకత వ్యక్తమైంది. తల్లిదండ్రులు ఎంత నచ్చజెప్పినా వినని మాన్యా, “నిన్ను పెళ్లి చేసుకోకపోతే ఆత్మహత్య చేసుకుంటాను” అని వివేకానందన్‌ను ఒప్పించి, పెద్దలను ఎదిరించి వివాహం చేసుకుంది.
ఏడు నెలల గర్భిణి: పెళ్ళైన కొత్తలో ప్రాణభయంతో ఈ జంట గ్రామం విడిచి 100 కిలోమీటర్ల దూరంలో తలదాచుకుంది. ప్రస్తుతం మాన్యా ఏడు నెలల గర్భిణి. నెలలు నిండటంతో ఇక తమ కుటుంబ సభ్యుల కోపం చల్లారి ఉంటుందని భావించి, ఈ నెల 8వ తేదీన తిరిగి సొంత గ్రామానికి వచ్చారు. కానీ, తమ పరువు తీసిందని మాన్యా తండ్రి ప్రకాష్ ఆమెపై పగ పెంచుకున్నాడు. బంధువుల మాటలు అతని కోపాన్ని మరింత పెంచాయి.
ఘాతుకం: గత ఆదివారం, ప్రకాష్ తన అనుచరులతో కలిసి వివేకానందన్ ఇంటిపై ఆయుధాలతో దాడి చేశాడు. భయంతో వివేకానందన్ పొలాల్లోకి పారిపోయాడు. సాయంత్రం మళ్ళీ ఇనుప పైపులు, గడ్డపారలతో వచ్చిన ఆ గుంపు.. ఇంట్లో ఉన్న వృద్ధులైన అత్తమామలపై విచక్షణారహితంగా దాడి చేసింది.
- వారిని కాపాడటానికి వచ్చిన మాన్యాను చూసి ఆమె తండ్రి ప్రకాష్ పశువులా ప్రవర్తించాడు.
- ఏడు నెలల గర్భిణి అని కూడా చూడకుండా ఇనుప పైపుతో ఆమె తలపై బలంగా బాదాడు.
- తీవ్ర రక్తస్రావంతో మాన్యా అక్కడికక్కడే కుప్పకూలిపోయింది.
మరణం: తీవ్రంగా గాయపడిన మాన్యాను, ఆమె అత్తమామలను స్థానికులు ఆసుపత్రికి తరలించారు. కానీ చికిత్స పొందుతూ మాన్యా మరణించింది. కడుపులోని బిడ్డ కూడా ప్రాణాలు కోల్పోయింది. ఈ ఘటనపై కేసు నమోదు చేసిన పోలీసులు, తండ్రి ప్రకాష్‌తో సహా ముగ్గురిని అరెస్ట్ చేశారు. మిగిలిన నిందితుల కోసం గాలిస్తున్నారు.