న్యూఢిల్లీ: భారత్‌తో ఘర్షణ ధోరణి బంగ్లాదేశ్‌కు భారీ నష్టాన్ని కలిగించవచ్చు. ముఖ్యంగా బంగ్లాదేశ్ విద్యుత్ సరఫరా భారత్ చేతుల్లో ఉన్నప్పుడు ఇది మరింత ప్రమాదకరం. గ్యాస్ కొరత, బొగ్గు ప్లాంట్ల నిర్వహణ సమస్యలు మరియు పెరుగుతున్న విద్యుత్ వినియోగం బంగ్లాదేశ్‌ను ఇబ్బందుల్లోకి నెట్టాయి. ఈ క్రమంలో భారత్ నుంచి వచ్చే విద్యుత్ ఆ దేశానికి ‘లైఫ్‌లైన్’గా మారింది.
ఒకవేళ భారత్ నుంచి సరఫరాలో స్వల్ప ఆటంకం కలిగినా బంగ్లాదేశ్‌లోని మెజారిటీ ప్రాంతాలు చీకటిలో మునిగిపోయే అవకాశం ఉంది. బంగ్లాదేశ్‌కు అత్యధికంగా విద్యుత్ సరఫరా చేస్తున్నది గౌతమ్ అదానీకి చెందిన అదానీ పవర్. ఈ సంస్థ ఒక్కటే ప్రతిరోజూ దాదాపు 1500 మెగావాట్ల విద్యుత్తును సరఫరా చేస్తోంది. ఇటువంటి పరిస్థితుల్లో భారత్‌కు వ్యతిరేక వ్యాఖ్యలు చేయడం బంగ్లాదేశ్‌కు రాజకీయంగా, ఆర్థికంగా భారంగా మారవచ్చు.
ప్రతి 100 యూనిట్లలో భారత్ వాటా ఎంత? బంగ్లాదేశ్ ప్రభుత్వ గణాంకాల ప్రకారం, గతేడాదితో పోలిస్తే భారత్ నుండి విద్యుత్ దిగుమతి సుమారు 70% పెరిగింది. జూలై వరకు ఉన్న ఏడు నెలల్లో ఈ దిగుమతులు ఎంతగా పెరిగాయంటే.. బంగ్లాదేశ్ మొత్తం విద్యుత్ సరఫరాలో భారత్ వాటా 9.5% నుండి 17%కి పెరిగింది. అంటే బంగ్లాదేశ్‌లో వినియోగించే ప్రతి 100 యూనిట్ల విద్యుత్తులో 17 యూనిట్లు భారత్ నుంచే వస్తోంది.
భారత్ నుంచి ఎంత విద్యుత్ అందుతోంది? ప్రస్తుత ఒప్పందాల ప్రకారం, భారత్ నుండి బంగ్లాదేశ్‌కు దాదాపు 2,800-3,000 మెగావాట్ల (MW) విద్యుత్తును దిగుమతి చేసుకునే సామర్థ్యం ఉంది. ఇటీవల కాలంలో సగటున ప్రతిరోజూ 2,200-2,300 మెగావాట్ల విద్యుత్తును భారత్ సరఫరా చేస్తోంది.
విద్యుత్ సరఫరా చేస్తున్న భారతీయ కంపెనీలు:
- అదానీ పవర్: 1,496 మెగావాట్లు (జార్ఖండ్‌లోని గొడ్డా ప్లాంట్ నుండి)
- NTPC/NVVN: 740 మెగావాట్లు
- PTC ఇండియా లిమిటెడ్: 250 మెగావాట్లు
- సెంబ్ కార్ప్ ఎనర్జీ ఇండియా: 170-250 మెగావాట్లు
భారత్‌పై ఎందుకు ఇంతలా ఆధారపడుతోంది? ఒకప్పుడు బంగ్లాదేశ్ తన విద్యుత్ అవసరాల కోసం గ్యాస్‌పై ఆధారపడేది. కానీ ప్రస్తుతం గ్యాస్ ప్లాంట్లలో సాంకేతిక లోపాలు, తక్కువ ప్రెజర్ వంటి సమస్యలు ఉన్నాయి. దీనివల్ల గ్యాస్ ఆధారిత ప్లాంట్లు పూర్తి సామర్థ్యంతో పనిచేయలేకపోతున్నాయి. ఫలితంగా బంగ్లాదేశ్ ఖరీదైనదైనా, నమ్మదగ్గ భారతీయ విద్యుత్ వైపు మొగ్గు చూపుతోంది.
బొగ్గు ఆధారిత విద్యుత్ ఉత్పత్తి కూడా 30.1% నుండి 26.2%కి పడిపోయింది. సొంత వనరులతో డిమాండ్‌ను తట్టుకోలేక బంగ్లాదేశ్ ఇబ్బంది పడుతోంది. అందుకే భారత్‌తో సంబంధాలు దెబ్బతింటే, అది నేరుగా బంగ్లాదేశ్ విద్యుత్ గ్రిడ్‌పై ప్రభావం చూపుతుంది. సరళంగా చెప్పాలంటే.. బంగ్లాదేశ్ విద్యుత్ ‘స్విచ్’ ప్రస్తుతం భారత్ చేతుల్లో ఉంది.