ఉత్తరప్రదేశ్‌లో వీధి కుక్క కరిచిన ఒక యువకుడు 24 గంటల వ్యవధిలోనే కుక్కలా ప్రవర్తించడం మొదలుపెట్టిన ఘటన తీవ్ర కలకలం సృష్టించింది.
భారతదేశంలో వీధి కుక్కల బెడద రోజురోజుకూ పెరుగుతోంది. దీనిని నియంత్రించాలని సుప్రీంకోర్టు ఆదేశించినప్పటికీ, రాష్ట్ర మరియు జిల్లా యంత్రాంగాలు ఎన్ని చర్యలు చేపట్టినా సమస్య పరిష్కారం కావడం లేదు. కుక్కలకు రేబిస్ వ్యాక్సిన్ వేయడం, సంతాన నిరోధక శస్త్రచికిత్సలు చేసి తిరిగి వదలడం వంటివి జరుగుతున్నా దాడులు మాత్రం ఆగడం లేదు. అటువంటి భయానక సంఘటనే అలీగఢ్ జిల్లాలో చోటుచేసుకుంది.
ఏం జరిగింది? అలీగఢ్ జిల్లా ఖైర్ తాలూకా ఉద్వారా గ్రామానికి చెందిన విజయ్‌పాల్ కుమారుడు రామ్‌కుమార్ (23) డిసెంబర్ 20వ తేదీ సాయంత్రం వీధిలో నడుచుకుంటూ వెళ్తుండగా ఒక కుక్క అతని కాలిపై కరిచింది. వెంటనే ఇంటికి చేరుకున్న రామ్‌కుమార్ తన కుటుంబ సభ్యులకు ఈ విషయం చెప్పాడు.
నాటు వైద్యం – నిర్లక్ష్యం: రామ్‌కుమార్ కుటుంబ సభ్యులు గాయాన్ని కేవలం నీటితో కడిగి, ఆ ఊరిలో ఉండే పాత ఆచారం ప్రకారం గాయంపై మిరప పొడిని రాశారు. గాయం చిన్నదిగా అనిపించడంతో రామ్‌కుమార్ కూడా పెద్దగా పట్టించుకోలేదు. ఆ రాత్రి 9 గంటల వరకు సాధారణంగానే ఉన్నాడు. అందరితో కలిసి రాత్రి భోజనం కూడా చేశాడు.
కుక్కలా ప్రవర్తన: రాత్రి 11 గంటల సమయంలో రామ్‌కుమార్‌కు ఏదో ఇబ్బందిగా అనిపించింది. అసౌకర్యంగా ఉందంటూ అసహనానికి గురయ్యాడు. కొద్ది గంటల్లోనే అతని పరిస్థితి విషమించింది. అతను తన శరీరాన్ని పదే పదే గీక్కుంటూ, కుక్కలా శబ్దాలు చేయడం ప్రారంభించాడు. నాలుక బయటపెట్టి పక్కన ఉన్న వారిని వాసన చూడటం, కరవడానికి ప్రయత్నించడం వంటివి చేశాడు. అతని ప్రవర్తన చూసి గ్రామం మొత్తం భయాందోళనకు గురైంది.
చికిత్స: పరిస్థితి చేయిదాటుతుండటంతో గ్రామస్థులంతా కలిసి రామ్‌కుమార్‌ను మంచానికి కట్టేశారు. డిసెంబర్ 21వ తేదీ సాయంత్రం అతడిని ఖైర్ కమ్యూనిటీ హెల్త్ సెంటర్‌కు తరలించారు. అక్కడ అతను కుక్కలా అరవడం చూసిన వైద్యులు, అతనికి తీవ్రమైన రేబిస్ (Hydrophobia) లక్షణాలు ఉన్నట్లు గుర్తించారు. మెరుగైన చికిత్స కోసం ఢిల్లీలోని ఎయిమ్స్ (AIIMS) ఆసుపత్రికి తరలించాలని సూచించారు. ప్రస్తుతం అతను ఎయిమ్స్‌లో చికిత్స పొందుతున్నాడు.