సంభల్ జిల్లాలో జరిగిన వ్యాపారి రాహుల్ హత్య కేసులో విస్తుపోయే నిజాలు బయటపడ్డాయి. తన భర్త అడ్డు తొలగించుకోవడానికి భార్య రూబీ, ఆమె ప్రియుడు గౌరవ్ కలిసి ఎంతటి ఘాతుకానికి పాల్పడ్డారో చూసి పోలీసులు సైతం షాక్ అయ్యారు.
‘మామ’ అని పిలిపించి.. ముసుగులో మోసం: పోలీసుల దర్యాప్తులో తేలిందేమిటంటే, రూబీ తన ప్రియుడు గౌరవ్‌ను సమాజానికి తన ‘సోదరుడు’ అని పరిచయం చేసింది. ఇంటి చుట్టుపక్కల వారు, బంధువులు కూడా అతడిని రూబీ తమ్ముడే అని నమ్మారు. చివరకు రాహుల్ పిల్లలు కూడా గౌరవ్‌ను ‘మామ’ అని పిలిచేవారు. ఈ ముసుగులో గౌరవ్ ఎప్పుడంటే అప్పుడు రాహుల్ ఇంటికి వచ్చేవాడు. రాహుల్ బయటకు వెళ్లగానే పిల్లలకు చాక్లెట్లు ఇచ్చి బయటకు పంపి, రూబీతో ఏకాంతంగా గడిపేవాడు.
రాడ్ మరియు సుత్తితో కిరాతక హత్య: నవంబర్ 18 రాత్రి రాహుల్ హఠాత్తుగా ఇంటికి వచ్చేసరికి, రూబీ మరియు గౌరవ్ ఇద్దరూ అసభ్యకర స్థితిలో పట్టుబడ్డారు. దీనితో ఇంట్లో గొడవ మొదలైంది. ఆ కోపంలో రాహుల్ నిద్రిస్తున్న సమయంలో రూబీ, గౌరవ్ కలిసి ఇనుప రాడ్ మరియు సుత్తితో తల మీద బలంగా బాదారు. దెబ్బలకు రాహుల్ అక్కడికక్కడే ప్రాణాలు కోల్పోయాడు.
శవం ముక్కలు.. గంగానదిలో తల: సాక్ష్యాలను చెరిపివేయడానికి వారు అత్యంత భయంకరమైన పద్ధతిని ఎంచుకున్నారు. గ్రైండర్ మిషన్ ఉపయోగించి రాహుల్ మృతదేహాన్ని ముక్కలు చేశారు. మొండెం మరియు చేతులను ఇంటికి సమీపంలోని కాలువలో పడేశారు. రాహుల్ తలని మాత్రం రామ్‌ఘాట్ వద్ద గంగానదిలో విసిరేశారు. ఆధారాలు దొరకకుండా రాహుల్ బట్టలను తగులబెట్టారు.
Tattoo ద్వారా బయటపడ్డ నిజం: హత్య జరిగిన ఆరు రోజుల తర్వాత రూబీ తన భర్త కనిపించడం లేదని పోలీసులకు ఫిర్యాదు చేసి నాటకమాడింది. 27 రోజుల తర్వాత కాలువలో కుళ్ళిపోయిన మొండెం లభ్యమైంది. శవం చేతిపై ‘రాహుల్’ అని ఉన్న టैटూని చూసి పోలీసులు మృతుడిని గుర్తించారు. ఇంటిని సోదా చేయగా రక్తపు మరకలు దొరికాయి. 10 ఏళ్ల కూతురు ఇచ్చిన వాంగ్మూలం రూబీపై అనుమానాన్ని బలపరిచింది.
కూతురి వేడుకోలు – “అమ్మకు, మామకు ఉరిశిక్ష వేయండి”: రాహుల్ 10 ఏళ్ల కుమార్తె ఏడుస్తూ పోలీసులకు అసలు విషయం చెప్పింది. “నేను మామ అని పిలిచే వ్యక్తి (గౌరవ్), మా నాన్న లేనప్పుడు ఇంటికి వచ్చేవాడు. నాన్నను చంపిన నా తల్లికి, ఆ మామకు ఉరిశిక్ష వేయాలి” అని కోరింది. పోలీసుల విచారణలో రూబీ తన నేరాన్ని అంగీకరించింది.