కోయంబత్తూరు: కోయంబత్తూరులో ప్లంబర్‌గా పనిచేస్తున్న ఒక వ్యక్తికి పలువురు మహిళలతో అక్రమ సంబంధాలు ఉన్నాయి. వివాహితుడైన ఇతను, యువతులతో జల్సాలు చేస్తూ గడిపేవాడు. ఈ విషయం భార్యకు తెలియడంతో ఏం జరిగిందో తెలుసా? ప్రస్తుతం సోషల్ మీడియాలో ఈ ఉత్తరాది దంపతుల గురించిన వార్త వైరల్ అవుతోంది.
వివరాల్లోకి వెళ్తే: అస్సాం రాష్ట్రం నాగావ్ జిల్లాకు చెందిన బిధాన్ హజారికా (33) మరియు అతని భార్య జింతి (36) కోయంబత్తూరులోని గణపతి ప్రాంతంలో నివసిస్తున్నారు. బిధాన్ ఒక అపార్ట్‌మెంట్‌లో ప్లంబర్‌గా పనిచేస్తున్నాడు. అయితే, బిధాన్‌కు పలువురు ఉత్తరాది మహిళలతో అక్రమ సంబంధాలు ఉన్నట్లు తెలుస్తోంది.
భార్యకు దొరికిన ఆధారాలు: ఒకరోజు భార్య జింతి అనుకోకుండా భర్త సెల్‌ఫోన్ చూసింది. అందులో ఉన్న అసభ్యకరమైన ఫోటోలు, మెసేజ్‌లు చూసి షాక్ అయ్యింది. భర్తను పద్ధతి మార్చుకోమని హెచ్చరించినప్పటికీ, బిధాన్ తన ప్రవర్తన మార్చుకోలేదు. పైగా ఆ మహిళలతో సంబంధాన్ని కొనసాగిస్తూనే ఉన్నాడు.
రెడ్ హ్యాండెడ్‌గా దొరికిన భర్త: ఒకరోజు జింతి బయటకు వెళ్ళిన సమయంలో, బిధాన్ తన ఇంటికి ఒక యువతిని రప్పించుకుని ఏకాంతంగా గడుపుతున్నాడు. అదే సమయంలో జింతి అకస్మాత్తుగా ఇంటికి రావడంతో, వారిద్దరినీ చూసి ఆగ్రహంతో ఊగిపోయింది. దీనిపై దంపతుల మధ్య తీవ్ర వాగ్వాదం జరిగింది. ఆ సమయంలో బిధాన్ భార్యను బెదిరిస్తూ.. “నీవు ఇక్కడ ఉండవద్దు, నీ సొంత ఊరు అస్సాం వెళ్ళిపో” అని గద్దించాడు.
భార్య ఘాతుకం: తప్పు చేసి కూడా తననే బెదిరిస్తున్నాడని జింతి తీవ్ర కక్ష పెంచుకుంది. భర్తకు తగిన గుణపాఠం చెప్పాలని నిర్ణయించుకుంది. ఘటన జరిగిన రోజు పని ముగించుకుని వచ్చిన బిధాన్, మద్యం మత్తులో నిద్రపోతుండగా.. జింతి వంటగదిలోని కత్తితో అతని మర్మాంగాన్ని కోసి వేసింది. అనంతరం భర్తను అదే గదిలో ఉంచి తాళం వేసి అక్కడి నుండి వెళ్ళిపోయింది. నొప్పితో కేకలు వేసిన బిధాన్ అరుపులు విని పొరుగువారు తలుపులు పగులగొట్టి అతడిని ఆసుపత్రికి తరలించారు. పోలీసులు కేసు నమోదు చేసి జింతిని అరెస్ట్ చేశారు.