పెళ్లి తంతు మొదలైంది, కొత్త జంట మండపంలో కూర్చున్నారు. కానీ అకస్మాత్తుగా ఒక విచిత్ర పరిస్థితి ఎదురైంది, దానివల్ల పెళ్లి ముందుకు సాగడం అసాధ్యమైంది. కారణం ఏమిటంటే.. వధూవరులు ఇద్దరూ కూడా పెళ్లికి అతి ముఖ్యమైన సిందూరం తేవడం మర్చిపోయారు.
పెళ్లిలో సిందూరానికి ఉన్న ప్రాముఖ్యత గురించి ప్రత్యేకంగా చెప్పనక్కర్లేదు. సిందూరం లేకుండా పెళ్లి క్రతువు పూర్తి కాదు. అయితే, దగ్గర్లోని పట్టణానికి వెళ్లి సిందూరం వెతికి తీసుకురావాలంటే చాలా సమయం పడుతుంది. అంతసేపు శుభకార్యాన్ని ఆపడం కూడా మంచిది కాదు. ఇటువంటి క్లిష్ట సమయంలో, నిమిషాల్లో సమస్య పరిష్కారమై పెళ్లి ఎటువంటి ఆటంకం లేకుండా పూర్తయింది.
సిందూరం మర్చిపోయిన కొత్త జంట కథ: వధూవరులు అన్ని ఏర్పాట్లతోనే వచ్చారు. ఈవెంట్ కంపెనీలకు చాలా బాధ్యతలు అప్పగించారు. కుటుంబ సభ్యులంతా ప్రశాంతంగా కూర్చున్నారు. బాధ్యతలన్నీ పంచుకున్నారు కానీ, హడావిడిలో సిందూరం తేవడం మర్చిపోయారు. ఇప్పుడు వెంటనే సిందూరం ఎక్కడ దొరుకుతుంది? ఎవరు వెళ్తారు? అనే ప్రశ్నలు మొదలయ్యాయి. ఆ సమయంలో కుటుంబ సభ్యులకు మరో దారి తోచక బ్లింకిట్ (Blinkit) యాప్‌లో సిందూరం ఆర్డర్ చేశారు.
15 నిమిషాల్లో డెలివరీ: ఆర్డర్ చేసిన 15 నిమిషాల్లోనే డెలివరీ బాయ్ నేరుగా పెళ్లి మండపానికి సిందూరాన్ని చేరవేశాడు. సిందూరం అందగానే వరుడు వధువు నొసట సిందూరం దిద్ది పెళ్లి తంతును పూర్తి చేశాడు. ఇది పెళ్లి రిసెప్షన్ సమయంలో జరిగిన వేడుకగా తెలుస్తోంది. కొద్దిసేపు వధూవరులతో పాటు బంధువులంతా సిందూరం కోసం ఎదురుచూడాల్సి వచ్చినా, ఎక్కువ ఆలస్యం కాకుండానే వస్తువు చేతికి అందింది.
సిందూరం మర్చిపోయిన విషయం తెలియగానే అక్కడున్న బంధువులంతా నవ్వు ఆపుకోలేకపోయారు. “ఇంత ముఖ్యమైన వస్తువునే మర్చిపోతారా? పెళ్లయ్యాక ఈ మతిమరుపు అలవాటు కష్టాల్లో పడేస్తుంది” అంటూ ఆటపట్టించారు. దీనికి సంబంధించిన వీడియో ఇప్పుడు సోషల్ మీడియాలో తెగ వైరల్ అవుతోంది. అయితే, కొందరు నెటిజన్లు ఇది నిజంగా జరిగినదా లేక ఈ-కామర్స్ కంపెనీ ప్రచారం కోసం చేసిన వీడియోనా అని అనుమానం వ్యక్తం చేస్తున్నారు.