న్యూఢిల్లీ: బ్రెజిల్, రష్యా, ఇండియా, చైనా, దక్షిణాఫ్రికా దేశాల కూటమి అయిన ‘బ్రిక్స్’ (BRICS), అమెరికా డాలర్‌పై ఆధారపడటాన్ని తగ్గించుకోవడమే లక్ష్యంగా భారీగా బంగారాన్ని నిల్వ చేస్తోంది. అధికారికంగా ఈ దేశాల వద్ద ప్రపంచ బంగారు నిల్వల్లో 20% మాత్రమే ఉన్నప్పటికీ, తమ మిత్రదేశాలతో కలిసి ప్రపంచ బంగారు ఉత్పత్తిలో దాదాపు 50% వాటాను ఇప్పుడు ఇవే నియంత్రిస్తున్నాయి.
బంగారు వేటలో రష్యా, చైనా: బంగారం కొనుగోలు చేయడంలో రష్యా, చైనాలు ముందున్నాయి. 2024లో చైనా 380 టన్నుల బంగారాన్ని ఉత్పత్తి చేయగా, రష్యా 340 టన్నుల వాటాను అందించింది. ఇదే బాటలో నడుస్తూ బ్రెజిల్ కూడా 2021 తర్వాత మొదటిసారిగా 2025 సెప్టెంబర్‌లో 16 టన్నుల బంగారాన్ని కొనుగోలు చేసింది.
భారత రిజర్వ్ బ్యాంక్ (RBI) వ్యూహం: భారతదేశం కూడా ఈ రేసులో ఏమాత్రం వెనుకబడలేదు. ఈ ఏడాది ఏప్రిల్ నుండి సెప్టెంబర్ వరకు ఆర్‌బీఐ సుమారు 600 కిలోల బంగారాన్ని తన నిల్వలకు చేర్చింది. సెప్టెంబర్ చివరి వారం నాటికి భారత్ వద్ద మొత్తం బంగారు నిల్వలు 880 టన్నులకు పెరిగాయి. గత ఏడాదితో పోలిస్తే సెంట్రల్ బ్యాంకుల బంగారు కొనుగోళ్లు 10% పెరగడం విశేషం. బంగారం ధరలు ఆకాశాన్నంటుతున్నా బ్యాంకులు కొనుగోళ్లను ఆపకపోవడం గమనార్హం.
డిజిటల్ బంగారం వైపు మొగ్గు: కేవలం భౌతిక రూపంలోనే కాకుండా, ఎక్స్ఛేంజ్ ట్రేడెడ్ ఫండ్స్ (ETFs) వంటి డిజిటల్ రూపాల్లో కూడా పెట్టుబడులు గణనీయంగా పెరిగాయి. ఇది గత ఏడాదితో పోలిస్తే 134% వృద్ధిని నమోదు చేసి 221 టన్నులకు చేరుకుంది.
ట్రంప్‌కు ఆందోళన కలిగించే అంశం: బ్రిక్స్ దేశాల వ్యూహం గురించి ఆర్థిక నిపుణులు విశ్లేషిస్తూ.. “బ్రిక్స్ దేశాలు బంగారాన్ని అధికంగా ఉత్పత్తి చేస్తున్నాయి, కానీ తక్కువగా అమ్ముతున్నాయి. అదే సమయంలో అంతర్జాతీయ మార్కెట్ నుండి బంగారాన్ని కొనుగోలు చేస్తున్నాయి. 2020 నుండి 2024 మధ్య కాలంలో ప్రపంచవ్యాప్తంగా జరిగిన బంగారు కొనుగోళ్లలో 50% వాటా బ్రిక్స్ దేశాల కేంద్ర బ్యాంకులదే. ఈ గణాంకాలు అమెరికా అధ్యక్షుడు డొనాల్డ్ ట్రంప్‌ను ఆందోళనకు గురిచేసే అవకాశం ఉంది” అని పేర్కొన్నారు.
అమెరికా డాలర్‌కు చెక్? ప్రస్తుతం ప్రపంచ వాణిజ్యంలో బ్రిక్స్ దేశాల వాటా దాదాపు 30%. త్వరలో ఈ కూటమి తమకంటూ ఒక ప్రత్యేక కరెన్సీని రూపొందించుకునే దిశగా అడుగులు వేస్తోంది. ఇప్పటికే గోల్డ్ మార్కెట్‌ను నియంత్రిస్తున్న బ్రిక్స్ దేశాలు, తమ సొంత కరెన్సీని తీసుకొస్తే అది అంతర్జాతీయ స్థాయిలో అమెరికా డాలర్ ఆధిపత్యానికి అతిపెద్ద సవాలుగా మారుతుందని నిపుణులు భావిస్తున్నారు.