క్రికెట్ అనేది అనిశ్చితిల ఆట. ఇక్కడ రికార్డులు సృష్టించబడటం, కనుమరుగు కావడం సహజం. కానీ, కేవలం ఒక్క బంతికి 286 పరుగులు సాధించిన కథను మీరు ఎప్పుడైనా విన్నారా? వినడానికి నమ్మశక్యంగా లేకపోయినా, క్రికెట్ చరిత్రలో ఇప్పటికీ చర్చించుకునే అత్యంత విచిత్రమైన మరియు ఆశ్చర్యకరమైన విషయం ఇది.
ఏమిటా సంఘటన? ఎక్కడ జరిగింది? ఈ ఆసక్తికరమైన కథనం 1865లో లండన్‌కు చెందిన ‘పాల్ మాల్ గెజెట్’ (Pall Mall Gazette) అనే పత్రికలో ప్రచురితమైంది. ఆ నివేదిక ప్రకారం, పశ్చిమ ఆస్ట్రేలియాలోని బన్‌బరీలో విక్టోరియా జట్టు మరియు స్థానిక జట్టు మధ్య ఒక మ్యాచ్ జరుగుతోంది. మ్యాచ్ యొక్క మొదటి బంతికే ఈ వింత ఘటన చోటు చేసుకుందట.
చెట్టు మీద చిక్కుకున్న బంతి! బ్యాటర్ బంతిని ఎంత బలంగా కొట్టాడంటే.. అది నేరుగా మైదానంలో ఉన్న ఒక ఎత్తైన ‘జర్రా’ (Jarrah) చెట్టు కొమ్మల మధ్య చిక్కుకుపోయింది. ఫీల్డింగ్ చేస్తున్న జట్టు ఆ బంతి కనబడటం లేదని (Lost Ball), దానిని ‘లాస్ట్ బాల్‌’గా ప్రకటించాలని అంపైర్‌ను కోరింది. అయితే, బంతి కంటికి కనిపిస్తోందనే కారణంతో అంపైర్లు ఆ విన్నపాన్ని తిరస్కరించారు.
తుపాకీతో బంతిని కిందకు దించేలోపే రికార్డు! బంతిని కిందకు దించడానికి ఏ దారీ లేకపోయేసరికి, చివరకు రైఫిల్ (తుపాకీ) తీసుకువచ్చి దానిని కాల్చి కిందకు పడేయాలని నిర్ణయించుకున్నారు. అనేక ప్రయత్నాల తర్వాత బంతి కింద పడింది. అయితే, ఆ బంతి కింద పడేలోపు మైదానంలో ఉన్న బ్యాటర్లు ఏకంగా 286 సార్లు అటు ఇటు పరిగెత్తి పరుగులు పూర్తి చేశారు! చివరకు బంతి చేతికి చిక్కగానే విక్టోరియా జట్టు తమ ఇన్నింగ్స్‌ను డిక్లేర్ చేసిందట.
ఇది నిజమా లేక కల్పితమా? ఈ ఘటనకు సంబంధించి ఎటువంటి అధికారిక రికార్డులు లేవు. ఒక్క బంతికి 286 పరుగులు తీయాలంటే బ్యాటర్లు సుమారు 6 కిలోమీటర్లు పరిగెత్తాలి, ఇది సాధారణ క్రికెట్ మ్యాచ్‌లో అసాధ్యమైన విషయం. ఆస్ట్రేలియాకు చెందిన ‘వెస్ట్రన్ మెయిల్’ పత్రిక దీనిని కేవలం ఒక “కల్పిత కథ”గా కొట్టిపారేసింది. అయినప్పటికీ, క్రికెట్ ప్రేమికుల మధ్య ఈ కథ ఇప్పటికీ ఒక అద్భుత గాథలా (Legend) ప్రచారంలో ఉంది.