ఉత్తరప్రదేశ్‌లోని మీరట్‌లో ఒక మహిళా సబ్-ఇన్‌స్పెక్టర్ ట్రాఫిక్ వివాదం కారణంగా కారు డ్రైవర్‌ను అత్యంత అసభ్యంగా దూషిస్తూ, బెదిరింపులకు పాల్పడిన వీడియో సోషల్ మీడియాలో వైరల్ అవుతోంది. ఆదివారం సాయంత్రం రద్దీగా ఉండే బాంబే బజార్ ప్రాంతంలో జరిగిన ఈ ఘటన పోలీసుల తీరుపై తీవ్ర ఆగ్రహాన్ని కలిగిస్తోంది.
అసలేం జరిగింది?
అధికారులు మరియు ప్రత్యక్ష సాక్షుల కథనం ప్రకారం.. ఆదివారం సాయంత్రం 7 గంటల సమయంలో అబూ లేన్ సమీపంలో భారీగా ట్రాఫిక్ జామ్ ఏర్పడింది. ఆ సమయంలో అలీఘర్ జిల్లాలో పనిచేస్తున్న సబ్-ఇన్‌స్పెక్టర్ రత్న రాఠీ, తన హ్యుందాయ్ i20 కారులో వెళ్తూ ఆ ట్రాఫిక్‌లో చిక్కుకుపోయారు. తన కారు ముందున్న వాహనంపై ఆగ్రహం వ్యక్తం చేస్తూ, ఆమె తన కారులో కూర్చునే అసభ్య పదజాలంతో దూషించడం ప్రారంభించారు.
వీడియోలో ఏముంది? వైరల్ అవుతున్న వీడియోలో సబ్-ఇన్‌స్పెక్టర్ తన కారు దిగి, ముందున్న కారు తలుపు తీసి మరీ లోపల ఉన్నవారిని బూతులు తిట్టడం కనిపిస్తుంది. కారులో ఉన్న ఒక మహిళ ఆమెను వారించే ప్రయత్నం చేయగా, ఆమెను కూడా అసభ్యంగా దూషించారు. కారు డ్రైవర్ బయటకు రాగానే సబ్-ఇన్‌స్పెక్టర్ అతనితో భౌతిక దాడికి దిగారు.
అసభ్యకర వ్యాఖ్యలు: ఆమె ఆ వ్యక్తిని బెల్టుతో కొడతానని, జైలుకు పంపిస్తానని బెదిరిస్తూ.. “నేను దరోగాను (ఎస్‌ఐని), నీ నోట్లో ముత్రం పోస్తాను” (Daroga hoon main, muh mein m**t dungi) అనే అత్యంత హేయమైన వ్యాఖ్యలు చేశారు. అక్కడ ఉన్న జనం ఆమెను శాంతింపజేయడానికి ప్రయత్నించినా, వారిపై కూడా ఆమె దురుసుగా ప్రవర్తించారు.
పోలీసుల స్పందన
మీరట్ ఎస్పీ (సిటీ) ఆయుష్ విక్రమ్ సింగ్ ఈ ఘటనను ధృవీకరించారు. నిందితురాలు రత్న రాఠీ అలీఘర్‌లోని మహువా పోలీస్ స్టేషన్‌లో పనిచేస్తున్నారని, సహారన్‌పూర్‌లో ఒక కేసు విషయమై కోర్టులో స్టేట్‌మెంట్ ఇచ్చి తిరిగి వస్తున్నట్లు గుర్తించారు. బాంబే బజార్‌లో ఏదో పని నిమిత్తం ఆగినప్పుడు ఈ గొడవ జరిగిందని ఆయన తెలిపారు.
ప్రస్తుతానికి ఈ ఘటనపై బాధితుల నుండి ఎటువంటి అధికారిక ఫిర్యాదు అందలేదని, లిఖితపూర్వక ఫిర్యాదు అందితే శాఖాపరమైన విచారణ జరిపి తదుపరి చర్యలు తీసుకుంటామని పోలీసులు తెలిపారు.