ఐఐఎం గ్రాడ్యుయేట్ సాలరీ స్టోరీ: ప్రముఖ సోషల్ మీడియా ప్లాట్‌ఫారమ్ ‘రెడిట్’ (Reddit)లో వైరల్ అవుతున్న ఒక పోస్ట్ అందరినీ ఆలోచింపజేస్తోంది. ఐఐఎం బెంగళూరులో చదువుకుని, ఏడాదికి రూ. 1.2 కోట్ల జీతం సంపాదిస్తున్న ఒక సీనియర్ కార్పొరేట్ ప్రొఫెషనల్.. గురుగ్రామ్‌లో ఇల్లు కొనడం తనవల్ల కూడా కావడం లేదని వాపోయారు.
అంతటి విజయం సాధించినా, ఈ నగరం యొక్క ప్రాపర్టీ మార్కెట్ రేట్లు చూస్తుంటే తాను ఈ పోటీలో వెనుకబడి ఉన్నట్లు అనిపిస్తోందని ఆయన రాశారు.
ఎవరు ఈ వ్యక్తి? ఆయన పరిస్థితి ఏంటి?
పోస్ట్ రాసిన వ్యక్తికి 40 ఏళ్లు. ఒక పబ్లిక్ లిస్టెడ్ కంపెనీలో సీనియర్ హోదాలో పనిచేస్తున్నారు. తన కుటుంబంలో సంపాదించే ఏకైక వ్యక్తి అతనే. పిల్లల బాధ్యతలు గానీ, పెద్ద అప్పులు గానీ ఏమీ లేవు. అతని వద్ద ఇప్పటివరకు దాచుకున్న సొమ్ము (లైఫ్ టైమ్ సేవింగ్స్) సుమారు రూ. 7 కోట్లు ఉంది. ప్రతి నెలా చేతికి వచ్చే జీతం (In-hand salary) దాదాపు రూ. 6 లక్షలు.
ఆయన పోస్ట్‌లోని ప్రధాన అంశాలు:
- ధరలు: ‘డీఎల్ఎఫ్ ఫేజ్-2’లో 2300 చదరపు అడుగుల బిల్డర్ ఫ్లోర్ ధర రూ. 5 కోట్ల నుండి ప్రారంభమవుతోంది.
- ప్రాంతాలు: ఎంజీఎఫ్ విలాస్ వంటి ఖరీదైన ఏరియాల్లో 4BHK ఫ్లాట్ ధర రూ. 14 కోట్ల పైమాటే.
- పాత అపార్ట్‌మెంట్‌లు: కొంచెం పాత అపార్ట్‌మెంట్‌లు కూడా రూ. 3.5 నుండి 4.5 కోట్లకు అమ్ముడవుతున్నాయి. వీటికి రిజిస్ట్రేషన్, రినోవేషన్ ఖర్చులు కలిపితే మొత్తం రూ. 5 కోట్లకు చేరుకుంటోంది.
లోన్ తీసుకోవడం పరిష్కారం కాదా?
ఒకవేళ తాను రూ. 5 కోట్లతో ఒక కొత్త 4BHK ఫ్లాట్ కొంటే, తన జీవితకాల పొదుపు మొత్తాన్ని ఖర్చు చేయాలి లేదా 20 ఏళ్ల పాటు భారీ ఈఎంఐ (EMI) కట్టాల్సి ఉంటుందని ఆయన ఆవేదన వ్యక్తం చేశారు. “నేటి కార్పొరేట్ ప్రపంచంలో అంత కాలం పాటు ఉద్యోగ భద్రత ఉంటుందనే గ్యారెంటీ ఎక్కడ ఉంది?” అని ఆయన ప్రశ్నించారు.
అంతేకాకుండా, ఇన్ని కోట్లు ఖర్చు పెట్టినా బిల్డర్ ఫ్లోర్లలో పార్కులు ఉండవని, క్లబ్బులు ఉండవని, కనీసం స్వచ్ఛమైన గాలి-నీరు అందుతుందనే నమ్మకం కూడా లేదని ఆయన విమర్శించారు. అనేక చిన్న బిల్డర్ల నిర్మాణాల్లో మొదటి కొన్ని ఏళ్లలోనే నాణ్యతా లోపాలు బయటపడుతున్నాయని ఆయన పేర్కొన్నారు.