బంగ్లాదేశ్‌లో హిందువుల లక్ష్యంగా దాడులు కొనసాగుతున్నాయి. మైమన్ సింగ్ జిల్లాలోని ఒక ఫ్యాక్టరీలో భద్రతా విధుల్లో ఉన్న బజేంద్ర బిస్వాస్ అనే అన్సార్ (గ్రామీణ పారామిలిటరీ దళం) సభ్యుడిని, నోమాన్ మియా అనే అతని సహచరుడు కాల్చి చంపాడు. ఇదే జిల్లాలో కొద్దిరోజుల క్రితం దీపు చంద్ర దాస్ అనే వ్యక్తిని కొట్టి చంపి, చెట్టుకు కట్టేసి తగులబెట్టిన ఘటన మరువక ముందే ఈ దారుణం జరిగింది.
ఏం జరిగింది?
బంగ్లాదేశ్ మీడియా కథనాల ప్రకారం.. 40 ఏళ్ల బజేంద్ర బిస్వాస్, నిందితుడు నోమాన్ మియా ఇద్దరూ మేహరాబారి ప్రాంతంలోని సుల్తానా స్వెటర్స్ లిమిటెడ్ ఫ్యాక్టరీలో భద్రత కోసం నియమించబడ్డారు. సోమవారం సాయంత్రం 6:30 గంటల ప్రాంతంలో ఈ దారుణం జరిగింది:
- నిర్లక్ష్యం కాదు, కావాలనే: అన్సార్ సభ్యుడు మహ్మద్ అజహర్ అలీ తెలిపిన వివరాల ప్రకారం.. గదిలో ఎలాంటి గొడవ లేదా వాదన జరగడం లేదు. అందరూ కలిసి కూర్చున్న సమయంలో నోమాన్ హఠాత్తుగా తన షాట్‌గన్‌ను బజేంద్ర తొడపై గురిపెట్టి.. “నిన్ను కాల్చేస్తాను” అని గట్టిగా అరుస్తూ ట్రిగ్గర్ నొక్కాడు.
- తీవ్ర రక్తస్రావం: కాల్పుల వల్ల బజేంద్ర ఎడమ తొడ నుంచి విపరీతంగా రక్తస్రావం అయింది. వెంటనే ఆసుపత్రికి తరలించినప్పటికీ, అతను అప్పటికే మరణించినట్లు వైద్యులు ప్రకటించారు.
నిందితుడి అరెస్ట్:
హత్య అనంతరం పారిపోవడానికి ప్రయత్నించిన నోమాన్ మియాను పోలీసులు అరెస్ట్ చేశారు. బజేంద్ర బిస్వాస్ సిల్హెట్ జిల్లాకు చెందిన వ్యక్తి కాగా, నిందితుడు నోమాన్ సునామ్‌గంజ్ జిల్లాకు చెందినవాడు. వీరి మధ్య గతంలో ఎలాంటి గొడవలు లేవని తోటి సిబ్బంది చెబుతున్నారు.
భయాందోళనలో మైనారిటీలు:
బంగ్లాదేశ్‌లో ప్రస్తుతం నెలకొన్న అరాచక పరిస్థితుల మధ్య, ఏకంగా భద్రతా దళాల్లోనే ఒక హిందూ సభ్యుడిని ఈ విధంగా హత్య చేయడం తీవ్ర చర్చకు దారితీసింది. ఇది వ్యక్తిగత కక్షల వల్ల జరిగిందా? లేక హిందువులను లక్ష్యంగా చేసుకుని చేసిన కుట్రనా? అనే కోణంలో పోలీసులు దర్యాప్తు చేస్తున్నారు. వరుసగా జరుగుతున్న ఇటువంటి ఘటనలు అక్కడి హిందువులలో తీవ్ర భయాందోళనలను కలిగిస్తున్నాయి.