రాంచీ: జార్ఖండ్‌లో రూ. 1 కోటి విలువైన 200 కిలోల గంజాయిని ఎలుకలు తినేశాయని పోలీసులు కోర్టులో చెప్పడంతో, సాక్ష్యాధారాలు లేక నిందితుడు విడుదలయ్యాడు. పోలీసులు చెప్పిన ఈ కారణం ఇప్పుడు దేశవ్యాప్తంగా చర్చనీయాంశమైంది.
కేసు నేపథ్యం
2022 జనవరిలో జార్ఖండ్ రాష్ట్రం ఓర్మాంజి పోలీసులు జాతీయ రహదారిపై వాహన తనిఖీలు చేపట్టారు. రాంచీ నుండి రామ్‌గఢ్‌కు డ్రగ్స్ తరలిస్తున్నారన్న సమాచారంతో ఒక బోలెరో కారును ఆపారు. కారులో ఉన్న ముగ్గురిలో ఇద్దరు పారిపోగా, బీహార్‌కు చెందిన ఇంద్రజిత్ రాయ్ (26) అనే వ్యక్తి పోలీసులకు చిక్కాడు. ఆ కారును తనిఖీ చేయగా 200 కిలోల గంజాయి లభ్యమైంది. దీని విలువ కోటి రూపాయల వరకు ఉంటుందని అప్పట్లో పోలీసులు తెలిపారు.
కోర్టులో ఏం జరిగింది?
ఈ కేసు విచారణ రాంచీ కోర్టులో జరుగుతుండగా, స్వాధీనం చేసుకున్న గంజాయిని కోర్టుకు సమర్పించాలని న్యాయమూర్తి ఆదేశించారు. అయితే, పోలీసులు ఆ గంజాయిని చూపించలేకపోయారు.
పోలీసులు కోర్టులో ఇచ్చిన వివరణ అందరినీ విస్మయానికి గురిచేసింది. స్వాధీనం చేసుకున్న 200 కిలోల గంజాయిని పోలీస్ స్టేషన్‌లోని స్టోర్ రూమ్‌లో భద్రపరిచామని, అయితే వాటిని ఎలుకలు తినేశాయని పోలీసులు వాదించారు. దీనికి సంబంధించి 2024 పోలీస్ స్టేషన్ రికార్డుల్లో కూడా నమోదు చేశామని చెప్పారు.
నిందితుడు విడుదల
ఏదైనా కేసులో శిక్ష పడాలంటే పక్కా ఆధారాలు ఉండాలి. ఈ కేసులో పోలీసులు చెప్పిన కారణం నమ్మశక్యంగా లేకపోవడంతో పాటు, నిందితుడి అరెస్టు మరియు కారు స్వాధీనం చేసుకున్న వివరాల్లో కూడా పొంతన లేకపోవడాన్ని కోర్టు గుర్తించింది. ముఖ్యమైన సాక్ష్యమైన గంజాయిని ఎలుకలు తినేశాయని చెప్పడంతో కేసు నీరుగారిపోయింది. దీంతో న్యాయస్థానం ఇంద్రజిత్ రాయ్‌ను నిర్దోషిగా విడుదల చేస్తూ ఉత్తర్వులు ఇచ్చింది.
పోలీసుల నిర్లక్ష్యంపై కోర్టు తీవ్ర అసహనం వ్యక్తం చేసింది. జార్ఖండ్‌లో ఇలాంటి ఘటనలు జరగడం ఇదే మొదటిసారి కాదు. గతంలో స్వాధీనం చేసుకున్న వందలాది మద్యం సీసాలను కూడా ఎలుకలు తాగేశాయని పోలీసులు కోర్టులకు చెప్పడం గమనార్హం.