ఝాన్సీలోని సెంట్రల్ జీఎస్‌టీ డిప్యూటీ కమిషనర్ (IRS అధికారిణి) ప్రభా భండారిని సీబీఐ అధికారులు అరెస్ట్ చేశారు. రూ. 70 లక్షల లంచం తీసుకుంటుండగా ఇద్దరు జీఎస్‌టీ సూపరింటెండెంట్లను రెడ్ హ్యాండెడ్‌గా పట్టుకున్న సీబీఐ, వారిచ్చిన సమాచారంతో ఈమెను నిందితురాలిగా నిర్ధారించింది. ఆమె వద్ద నుండి భారీగా నగదు, బంగారం, వెండి మరియు మొబైల్ ఫోన్లను స్వాధీనం చేసుకున్నారు.
అసలేం జరిగింది?
జీఎస్‌టీ ఎగవేతకు సంబంధించి ఒక ప్రైవేట్ కంపెనీ నుండి రూ. 1.5 కోట్ల లంచం డిమాండ్ చేసినట్లు ఆరోపణలు వచ్చాయి. డిప్యూటీ కమిషనర్ ప్రభా భండారి నేతృత్వంలోని బృందం ఝాన్సీలోని ‘జై దుర్గా హార్డ్‌వేర్’ సంస్థపై దాడి చేసింది. ఆ తనిఖీల్లో సుమారు రూ. 13 కోట్ల పన్ను వసూలు చేయాల్సిన అవసరం ఉందని గుర్తించారు. ఈ కేసును నీరుగార్చడానికి రూ. 1.5 కోట్లకు డీల్ కుదుర్చుకున్నారు.
ఆ ఒక్క కాల్‌తో అడ్డంగా దొరికిపోయారు:
డీల్ ప్రకారం తొలి విడతగా రూ. 70 లక్షలను ప్రభా భండారికి చేరవేయాల్సి ఉంది. ఈ డబ్బు మొదట ఆమె సహచర అధికారి అనిల్ వద్దకు చేరింది. అయితే ఈ వ్యవహారంపై అప్పటికే నిఘా పెట్టిన సీబీఐ, అనిల్ చేత ప్రభా భండారికి ఫోన్ చేయించింది. అనిల్ ఫోన్ చేసి “మేడమ్, పార్టీ నుండి రూ. 70 లక్షలు వచ్చాయి” అని చెప్పారు.
దానికి ప్రభా భండారి వెంటనే స్పందిస్తూ.. “చాలా బాగుంది. ఆ డబ్బును వెంటనే బంగారంగా (Gold) మార్చి నాకు ఇచ్చేయ్” అని బదులిచ్చారు. ఈ కాల్‌ను రికార్డ్ చేసిన సీబీఐ వెంటనే రంగంలోకి దిగింది. ఆ సమయంలో ఆమె ఢిల్లీలో ఉండగా, సీబీఐ బృందం అక్కడికి వెళ్లి ఆమెను అరెస్ట్ చేసి ఝాన్సీకి తరలించింది.
సోదాల్లో లభించినవి:
సీబీఐ బృందం ప్రభా భండారికి చెందిన ఢిల్లీ ఫ్లాట్‌తో పాటు ఝాన్సీ, గ్వాలియర్ మరియు ఇతర ప్రాంతాల్లో ఏకకాలంలో సోదాలు నిర్వహించింది. సుమారు 4 గంటల పాటు జరిగిన ఈ తనిఖీల్లో కీలక పత్రాలు, నగదు లభించాయి.
ఎవరీ ప్రభా భండారి?
ప్రభా భండారి 2016 బ్యాచ్‌కు చెందిన ఐఆర్ఎస్ (IRS) అధికారిణి. ఆమె ఝాన్సీలో డిప్యూటీ కమిషనర్‌గా బాధ్యతలు చేపట్టి కేవలం ఆరు నెలలే అవుతోంది. ఇంత తక్కువ సమయంలోనే ఆమె ఝాన్సీలో ఒక ఖరీదైన ఫ్లాట్‌ను, మరికొన్ని విలువైన వస్తువులను కొనుగోలు చేసినట్లు సీబీఐ గుర్తించింది.
ప్రస్తుతం సీబీఐ ఆమెపై మరియు ఆమె సహచరులపై కేసు నమోదు చేసి దర్యాప్తు చేస్తోంది.